Siunissaqaasa 2026

CSR Greenland, Nuummi Sulisitsisut aamma Kommuneqarfik Sermersooq suleqatigiillutik suliffiusinnaasut ilinniarfiusinnaasullu pillugit pingasunngornermi 28. januar 2026 nittarsaassinermik aaqqissuisuupput. Inuit 700-t missaanik amerlassuseqartut Siunissaqaasami peqataapput. Siunissaqaasa atuartunut 9. aamma 10. kl.-tunut sammitinneqarpoq. Atuartut peqataanerat ullormi atuarfiusumi pisassaannut ilaatinneqarpoq, atuartullu nittarsaassisunut apeqqutissatik piareersareersimallugit peqataapput. Atuartut 470-t missaannik amerlassuseqartut Nuummi atuarfinneersut peqataapput.

Nittarsaassisut

Suliffeqarfiit, ilinniarfeqarfiit ammalu suliffeqarfiit allat 38-t Siunissaqaasami peqataapput, katillugit inuit 100-t missaat. Nittarsaassisuni suliffeqarfinni ilinniartut suliffigisami ilinniagarlu toqqarsimasartik namminnerlu misigisartakkatik kiisalu misilittakkatik pillugit 9. aamma 10.- kl.-ni atuartunut nassugiaateqarlutik saqqummiisarput.  

Siunissaqaasa – tamanut ammasoq

Siunissaqaasa inuusuttunik soqutiginnittunik aamma alakkarneqarpoq. Periarfissaq taanna inuusuttut Majoriameersut Niuernermik Ilinniarfimmeersut, GUX Nuummersut allallu katillugit 100-t missaannik amerlassuseqartut atorluarpaat. Taakkuami inuusuttut allat peqatigalugit ilinniarfiusinnaasut kiisalu suliffiusinnaasut pillugit isumassarsioqataaput.  

Aqutsisoq aammalu influenceri

Qulutius Events nittarsaassinermi program nipilersuutit aammalu oqaaseqarnerit aqutarai. Qulutaq Kleemann, Qulutius Events-mik piginnittoq nammineq suliffeqarfimmik aallartitsisimanini kiisalu ilinniagaq toqqakkani pillugit inuusuttunut saqqummiivoq. Influenceri Kiki Godtfredsen Siunissaqaasamut videonik assigiinngitsunik suliaqarpoq. Videoni inuusuttut ilinniagaq pillugu toqqaasinanermik aammalu suliffeqarfimmik pilersitsisimanertik pillugu oqaluttuarput, Siunnisaqaasamut ammasumut qaaqqusissut kiisalu ullormi Siunissaqaasa 2026-mi peqataasut aallaavigalugit aamma videoliorpoq. Video-t uani takuneqarsinnaapput www.csr.gl  

Naliliineq

Atuartut Siunissaqaasami peqataanertik pillugu naliliipput. Nittarsaassisut aammattaaq naliliipput. Naliliititsinerup siunertaraa peqataasunit Siunissaqaasamik aaqqissuussap sutigut pitsanngorsarneqarsinnaanera pillugu paasisaqarusunneq aammalu inuusuttut nittarsaassinermi peqataanermikkut ilinniarfissanik isumassarsisimanerat malinnaavigineqarusulluni.  

Aningaasaleeqataasut

Siunissaqaasap ingerlanneqarnerani aningaasaleeqataapput:

• Kommuneqarfik Sermersooq
• Nuummi Sulisitsisut
• Arctic Import
• Pisiffik
• Kaargo
• CSR Greenland

 

Siunissaqaasa – illoqarfinni allani

QAQISA, sumiiffinni atuartuunermiit sulisartunngornermut ikaarsaarnermut suliniut CSR Greenland-ip suliniutaanut 2015-miilli ilaavoq. CSR Greenland-ip QAQISA-p ineriartorteqqinneranut atatillugu ilinniarfiusinnaasut suliffiusinnaasullu pillugit nittarsaassineq Siunissaqaasa pilersippaa Nuummilu misilerarneqarnera ingerlanneqarpoq. Misileraanermi imarisatigut kiisalu peqataasut naliliisarneranik misilittakkat katersornissaat pingaartinneqarpoq. CSR Greenland-ip ilinniarfiusinnaasut suliffiusinnaasullu pillugit nittarsaassinermi sumiiffinni ataasiaakkaani ilitsersuutitut atorsinnaasumik suliaqarpoq. Ilitsersuut tamani, illoqarfigisap angissusaa apeqqutaatinnagu, atorsinnaanngorlugu ilusilersorneqarpoq, sumiiffinnimi atuartuunermiit sulisartunngornermut ikaarsaarnermut tamani periarfissaammat.