MT Højgaardip inuiaqatigiinni akisussaaqataalluni sulinera

Sanaartornermik ingerlatsivik MT Højgaard illunik sanaartugassanillu allanik, Kalaallit Nunaanni pisortat privatillu sullittarlugit, ingerlavoq. Aamma nammineq akilersukkaminik sanaartukkanik ingerlatsisarpoq. MT Højgaard inuiaqatigiinni akisussaaqataalluni ingerlatsivoq, ilaatigut sumiiffiusuni sulisunik ilinniartunillu tigusisarnermigut aammalu avatangiisinik mianerinnittumik suliarinnittarnermigut. Steffen Sloth, MT Højgaardip Kalaallit Nunaanni immikkoortortaqarfiani pisortaasoq, uani suliffeqarfiup ingerlatai pillugit annertunerusunik oqaluttuarpoq.

Ajornakusoortuupput piumasaqaatit sulinermilu pisariaqartitat naapeqatigiissinniartarneri

Sapinngisatsinnik sumiiffigisani sulisoqarnissamik ilinniartussanillu tigusisarnissamik piumasarisaasut malinniartarpagut. Suliarinnittussarsiuussisoqartillugu nalinginnaasumik pisortat piumasarisarpaat, sumiiffigisani sulisussat pissarsiarineqartarnissaat, aammalu sulianut ataasiakkaanut atatillugu aaliangersakkat malillugit amerlassusilersuinerit malillugit sumiiffigisaminngaanneersunik sulisoqartassasugut, soorlu assersuutigalugu suliassat 10 mill. koruuninik imal. 100 mill. koruuninik naleqarneri aallaavigalugit.

Sanaartortitsisulli suliarinnittullu maanna paasinikuuaat, ilaatigut ajornarsinnaasartoq piumasarisat naammassivillugit malinnissaat.

Sumiiffigisani ilisimasat inissipput

Naak sumiiffigisani najugaqartunik atorfinitsitsiniarneq unamminartoqartaraluartoq, malugisinnaavarput suliatsinni sumiiffigisaninngaanneersunik sulisoqartarnerput qaffakkiartortoq. Sumiiffigisanilu sulisussat kajungertilissagaanni pisariaqarajuttarpoq, suliap aallartissimanissaa sumiiffiusumi ersittunngorlugu.

Sanasussallu nalinginnaasumik allani firmani sulisuusarput, taamallu suliassat isumaqatigiissutaasimasutut naammasseqaartariaqartarlugit, uatsinnut nuussinnaatinnatik.

Takorusunnaraluarpoq, sumiiffigisani kalaallinik sanasunik amerlanerusunik peqalernissaa. Uatsinnummi ajornannginnerugaluarpoq summiiffigisaneersunik sulisoqarnissaq. Kalaallimmi sanasut nunatsinni sanaartueriaatsit ilisimavaat, nunatsinni sulineq sungiusimallugu aammalu silap  nikerartarnera ilisimaaralugu. Taamaattumik taaneqartut pigigutsigit pitsaanerusumik sulianik takutitsisinnaassagaluarpugut ullullu suliffigisagut nuannernerulissagaluarlutik. Taamaattumik annertuumik suliniuteqartarpugut sumiiffigisani sulisussatsinnik piniarluta, tamatumunnga tunngavissaqaraangatta.

Uagullu suliniuteqartarpugut sulisut ajunngitsunik atugassaqartinniarlugit. Tamakku ilaat annertoorsuunngikkaluarput, soorlu kissasseriartorfissaqartitsinissaq, sannatinik eqqortunik peqartitsinissaq aammalu atortussanik allanik naleqquttunik sulisunut atugassaqartitsinissaq. Nuannersumik suliffissaqartitsinissaq pingaartipparput sulisugullu SIK-mik isumaqatigiissutit tunngavigalugit atorfinitsittarlugit.

Ilinniartunngorumasut kikkulluunniit tikilluaqqusaapput

Nukippassuit atortarpagut ilinniartussarsiorluta ullumikkullu sanasutut ilinniartut marluk aammalu betonilerisutut ilinniartut marluk tigummisarivagut. Tunngaviatigut ilinniartunngorumasut inissaqartitagut tigusarpagut, aammali ajornartorsiutigaluguttaaq, ilinniartut naammassininnissami tungaanut ingerlatinniartarnerat.

Ilinniartuuteqarnikuuvugummi pingasunik ilinniarnermi ikerinnaani unittunik. IIlinniartut misiliillutik suligaangamik ingerlalluartarput, kisiannili atuagarsornertaasut tikikkaangamikkit malinnaaniarnertik ajornartorsiutigilertutut ittarlugu. Atuanngitsuukulalersarput, atuarfiillu uatsinnut nalunaarutiginnittarput. Takorusukkaluarparput, qanoq ingerlanerinik atuarfiit malittarinninnerusarnissaat, aamma ilinniartut praktikerfimmiittarnerinut atatillugu.

Suummi tamarmik imminnut ataqatigiipput – tassa pisariaqartikkaluarpagut  ilinniartut amerlanerusut naammassinnittartut naammattunillu sulisoqarnissaq. Inuusutullu ilinniakkaminnik naammassinnittut amerliartorpata, tamanna inuiaqatigiit kalaallit iluaqutigissagaluarpaat. Sanasut amerlanerusut nammineq pigilerutsigit, taava avataanit tikisitsisarnerit appassapput. Tamannalu inuiaqatigiinnut iluaqusiisussaavoq, uagullu tamatuma angunissaa peqataaffigerusupparput.

Akunnermusialinnik kajungertitsiniarsarinerup saniatigut MT Højgaard siunnerfilersugaalluartumik sulivoq, Arktisk Teknologimi ilinniartunik pissarsiniarluni. Tamakku ilaatigut ingeniøritut misiliillutik sulisuusinnaasarput aammalu tamaviaarutigineqarpoq ingeniøritut naammasseqqammersunik Kalaallit Nunaanni  pilersaarutini sulisussanik pissarsiortarneq.

Minguinnerusumik suleriaaseqarnissamik pilersaaruteqarneq

Nuummi betonelementfabrikkimik sananissaq pilersaarutigaarput taamatut iliornikkut Danmarkimi taaneqartunik tunisassiortaneq Kalaallit Nunaannut nuutsissinnaajumallugu. Tamanna anguneqarsinnaappat avatangiisinut mianerinninnerusumik sanaartorneq pisinnaassagaluarmat, sanaartorneq hallimut nuullugu, silami nillertillugu betonimik kissaasariaqartarneq pisariaarutsillugu. Aammalu taava ikummatissaq sipaarfigilissagaluarparput, ikummatissaq forminik, betoninik illunillu kiassaanerit sipaarfilerlugit.

MT Højgaardimit aamma pingaartinneqarpoq sanaartorfinni eqqakkanik annikillisaanissaq tassa eqqakkanik sapinngisamik atueqqiilerneq  aqqutigalugu. Ilami atuilluarnerunngilaq eqqakkat piiarnissaannut nukippassuit piffisarlu atussallugit. Eqqakkat ikilippata, taava sipaagaqalissaagut. Pingaartuuvoq, eqqakkanik ikilisaanissarput aammalu eqqakkanik immikkoortiterillualernissarput.

Pilersaarusiornerni siusissukkut entreprenørit peqataatittarlugit

Kalaallit Nunaanni sanaartornermi pikkoriffigineqarnerusariarpoq pilersaarutini siusissukkut entreprenørit peqataatittalernissaat. Sanaartortinniagarmi suliarinnittussarsiuunneqaraangat, taava pilersaarusiornera tamatigut naammassineqareersimasarpoq uagullu taava titartakkat naammassisimasat tunngavigalugit suliaqalertarpugut. Entreprenørit peqataatinnerisigut siusinnerusukkullu oqaloqatiginninnilernikkut kaammattuutigilissagaluarpagut akikinnerusunik eqiinganerusumillu sanatitsisinnaanerit.  Isumannaarsinnaalissagaluarparpullu, sanaartueriaatsit pitsaanerusut isumatusaarnerusullu atulernissaat avatangiisinik mianerinninnerusumik ilusiligaasut. Tamakkumi tamarmik  inuiaqatigiinnut iluaqusiisussaassammata.