Kalaallit Nunaat Saligaatsoq 2021

Ukioq manna illoqarfinni 16-ini Saligaatsoq ingerlanneqareerpoq, augustimilu Ittoqqortoormiini saliisoqassalluni. Sumiiffinni mikinerni nunaqarfinnilu KNI Pilersuisoq A/S-ip qulakkeerpaa peqataatitsinissani. Taakkunanilu eqqakkat 6,7 tonsit katersorneqarlutik. Nunaqarfinni 37-ni Saligaatsoq ingerlanneqarnissaa suli amigaataavoq, ilaasalu aput aanniariarpat saliiniarlutik. Suliffeqarfiit nunaqarfinni taakkunaniittuni Saligaatsoq ingerlanneqarnissaa qulakkeerniarlugu peqataasinnaapput tapersersuillutillu (allaaserisap naqqani sumiiffiit pineqartut takukkit).

Saligaatsoq ingerlanneqarnissaanut suleqatigiinneq qulakkeerinnippoq

Sumiiffinni ataqatigiissaarisut Saligaatsup ingerlanneqarnissaanut qulakkeerinnipput, suleriaaserlu sumiiffimmiit sumiiffimmut assigiinngissuteqartarluni. Uummannami, Ilulissani, Ittoqqortoormiini, Paamiuni Tasiilamilu Najukkami Ataatsimiititaliat saliisitsinissamut ataqatigiissaarisuusarput.

Sumiiffinni mikinerusuni nunaqarfinnilu saliisitsinissamut innuttaasut peqataasinnaanissaat qulakkeerumallugu ukioq manna CSR Greenlandip KNI Pilersuisoq A/S suleqatiseraa, tassanilu suliffeqarfiup ataqatigiissaarineq isumagisimavaa.

Inuussutissarsiortunut siunnersuisartut, Arctic Circle Business (Maniitsoq) aamma Destination Diskobay A/S (Aasiaat), ataqatigiissaarinissamut suliaq tigusimavaat, peqatigiiffiillu, suliffeqarfiillu innuttaasullu suliassamut peqataatillugit iluatsilluartumillu kivitseqatigisimallugit.

Narsami, Qaqortumi Nanortalimmilu Kalaallit Nunaat Brugseni siuttuunissaq tigusimavaat, innuttaasullu saliinissamut peqataatissimallugit.

Ikerasammi nammineq kajumissutsiminik sulisup (Dorthe Qvist Jeremiassen) pilersaarusiorneq aallartisarsimavaa iluatsillugulu, Namminersorlutillu Oqartussat ingerlataanni, Pinngortitap Paarsisuaisa unammisitsineranni 3.000-inik nunaqarfiup ajugaassutigisaminik.

Kangaatsiami najukkami siunnersuisoqatigiit, timersoqatigiit, kommuni aamma kommunalbestyrelse pilersaarusiornermi suleqatigineqarput.

Qasigiannguani nammineq kajumissutsiminnik saleerusuttunut immikkut aaqqissuussamik iliuuseqartoqarpoq, taamaasillutik nammineq kajumissutsiminnik saleerusuttut nammineq piffissami aaliangikkaminnik saliisarsimapput eqqakkallu katersorneqarnikut kommunimit tigoorarneqarlutik.

Nuummi CSR Greenland suli ataqatigiissaarisuuvoq, sinerissallu sinneranut attaveqarfiulluni.

Aningaasaliissutit

Sumiiffinni tamani ataqatigiissaarisut aningaasaliisussanik ujartuineq tigummineqarpoq, sumiiffinnilu tamani suliffeqarfiit tunniussaqarnissamut tapersersuilluartarlutik. Stark Kalaallit Nunaat A/S utikajaartunngornikuusumik, ukiut tamaasa sumiiffigisaminni puussiarsuarnik aaqqatinillu tapersiisarpoq. Assinganillu KNI Pilersuisoq A/S sumiiffinni aallarniisut qanimut suleqatigisarlugit. Nuummi Pisiffik A/S peqataasut imeruersaatissaannik naatitanillu tapersiivoq.

Avatangiisit piujuaannartitsinerlu pillugu ukkataqarneruneq

Ukioq manna Saligaatsoq tapersersorumallugu Mediehuset Sermitsiaq.AG-ip avatangiisit piujuaannartitsinerlu pillugit sammisamik saqqummersitsivoq. Sammisap qulequtaraa ”Tamatta siunissamik qulakkeerinneqataassaagut”, tassanilu suliffeqarfiit assigiinngitsut ukkatarinninnerat pillugu atuartoqarsinnaavoq. Sammisaq uani atuaruk.

Paasissutissanik katersineq

Saliisitsisarnerit aallaavigalugit allannguinissamut toqqammaviliisinnaaniarluni CSR Greenlandip paasissutissanik katersisalernissaq sulissutigisimavaa. Saliisitsinerit pillugit aaasissutissat tamakkiisut uani takuneqarsinnaapput. Siunertaq toqqammavigalugu Sinerissami saliinissamut paasissutissanillu katersinissamut ilitsersuut pilersinneqarnikuuvoq. Taannalu atorlugu erseqqissaassutigineqassaaq eqqakkat suut Kalaallit Nunaata imartaanut pisarnersut, qanorlu pinaveersaartitsisumik iliuuserineqarfigisinnaanersut. Soqutiginnittut ilitsersuut atorsinnaavaat, nammineq sinerissami saliisitsillutik imaluunniit Saligaatsoq paasissutissanik katersinertalimmik ingerlallugu. Ilitsersuut uani aaneqarsinnaavoq.