Nuummi piujuartitsineq pillugu nunani avannarlermiut ataatsimeersuarnerat
”Ukiuni arlalinngortuni Global Compact-ip naapinnera pitsaanerpaaq”, Global Compactip nunani avannarlerni attaveqarfianni naapinnermi peqataasut taamatut oqarput.
Nunani avannarlerni attaveqarfianni nunat arfiniliusut ukiumut ataasiarlutik naapittarput piujuartitsinermi Global Compactip najoqqutassiai qulit akisussaassuseqartumik suliffeqarfimmik ingerlatsinermut sammiveqartut aamma Nunarsuarmi anguniakkat aallaavigalugit misilittakkaminnik isumassarsiaminnillu avitseqatigiinniarlutik. Ukioq mannalu naapinneq Nuummi pivoq.
Ataatsimeersuarnermi Nuummi Hotel Hans Egedep ataatsimiittarfianni ingerlanneqartumit inuussutissarsiortuneersut inuit 100-it missaannittut peqataapput, saniatigullu attaveqaatitigut nunani avannarlerneersut 100-t peqataapput.
Ulloq siulleq Global Compactip New York-imi allaffeqarfianiit, GrønlandsBANKEN, Isavia, FLSmidth, Chr. Hansen, Carlsberg, Mærsk, Stora Enso, Hurtigruten, Bakkafrost, Icelandair, Marel, Nukissiorfiit, Air Greenland, Rambøll, Ericsson arlalinniillu ilaatigut saqqummiisoqarpoq.
Suliffeqarfiit piujuartitsinermut, CSR aamma Nunarsuarmi anguniakkanut suliniuteqarnermi misilittakkaminnik suliniutiminnullu nutaanik isumassarsiorniarlutik peqataapput.
Ataatsimeersuarnermi immiussat saqqummiinermilu atorneqartut uani nassaarineqarsinnaapput: https://csr.gl/nordic-global-compact-network-meeting-2021/
Naapinneq arlalitsigut CSR Greenlandimut pingaaruteqarpoq:
Christian Keldsen, Sulisitsisuni pisortaq aamma CSR Greenlandimi siulittaasoq:
Suliffeqarfiutitsinnut periarfissatsialaavoq nunani avannarlerni attaveqarfiit nutaat ineriartortinnissaanut aamma piujuartitsinerup iluani suliffeqarfiit siuttuusut ilikkagaqarfiginissaanut. Sulinermut isumassarsianik nukissanillu aallerfiuvoq, minnerunngitsumillu piujuartitsinermut suliniuteqarneq qanoq suliffeqarfiit unammillersinnaanerannut nukkassaaqataalluni qulakkeerinnissinnaaneranut.
Martin Kviesgaard, GrønlandsBANKEN-imi pisortaq aamma CSR Greenland siulersuisuni siulittaasup tullia:
Nunani avannarlerni suliffeqarfiit tusarnaarnissaannut qilanaarpunga aamma GrønlandsBANKEN-ip piujuartitsinermi suliaqarnera pillugu oqaluttuarinissaanut, immaqalu taamaasilluta suliffeqarfiit allat isumassarsiortissinnaallugit.
Anguniagarineqartumi Amerlasuutigut/tamatigut Kalaallit Nunaat siuarsimavoq, minnerunngitsumillu ukiuni aqqanilinnit kingullerni CSR Greenlandip suliniuteqarnera pissutaaqataavoq.
Anne Mette Christiansen, CSR Greenlandimi siunnersortaaneq aamma Rambøll-imi nittarsaassinermut pisortaq:
Assut tulluusimaarutigivara, piujuartitsineq aallaavigalugu suliniuteqarnermi kalaallit suliffeqarfiutaasa siuariangaatsiarsimanerannut. Suliffeqarfiit akornanni soqutiginninneq annertooq pigineqartoq takusinnaavarput, tamannalu ersiuttarpoq ilaatigut CSR Greenlandimi piujuartitsineq pillugu pikkorissartitsinernut soqutiginninneq annertooq pigineqartarmat, piujuartitsineq aallaavigalugu accelaratorimik ingerlanneqartunut peqataanikkut minnerunngitsumillu suliffeqarfiit akornanni attaveqarfeqarneratigut.
Tunuliaqut
FN Global Compactip akisussaassuseqartumik suliffeqarfimmik ingerlatsinissamut tunngaviit qulit, atsiornikkut suliffeqarfiit imminnut pisussaaffilersinnaapput malinniarlugit.
Tunngaviit qulit ukununnga sammipput inuit pisinnaatitaaffii, sulisorineqartutut pisinnaatitaaffiit, avatangiisit aamma peqquserlutsaaliuinissamut tunngasut. Kalaallit Nunaannit ilaatigut Air Greenland, GrønlandsBANKEN, Tusass, Sulisitsisut, Brugseni aamma Nukissiorfiit atsiorsimapput tunngaviillu ataqatigiissakkamik aaqqissuussilluni suliniutigalugit. Global Compact suliffeqarfittut piujuartitsilluni ineriartortitsinermi FN-ip nunarsuarni anguniagaanut (SDG-it) ilusilersukkamik suliarinissaanut tunngavissaavoq.
