Nunarsuaq tamakkerlugu anguniakkat ataatsimoorluni tunngavissatut
Transparency International Grønland ulloq 14. november FN-ip nunarsuaq tamakkerlugu anguniagai pillugit suleqatigiissitsivoq, nunatsinni inuiaqatigiinni suliniaqatigiiffiit assigiinngitsut CSR-imik suleqatiginnittut peqataaffigisaannik.
Suleqatiigiissitsinermilu peqataajartorlutik ornigupput suliniaqatigiiffiit assigiinngitsut quliusut, soorlu makkuusut: WWF, ICC, Red Barnet, Kræftens Bekæmpelse, Foreningen Grønlandske Børn, MIO aammalu Natteravnene. Nunarsuarmilu anguniakkat pillugit oqallipput akunnerni sisamani eqqartorlugit taakku nunatsinni qanoq timitalerneqarsinnaaneri atorneqarsinnaanissaallu.
Transparency International Grønlandimi siulersuisuni siulittaasoq Anita Hoffer oqarpoq: ”Nuannaarutigeqaarput nunatsinni NGO-t taamatut amerlatigisut peqataanerat, tamannami Kalaallit Nunaanni piujuaannartitsineq pillugu oqallissinnaanissatsinnut ataatsimoorluta alloriarfissatsinnik pingaartumik pilersitsivoq”.
Suleqatigiissitsinermi suliniaqatigiiffiit peqataasut piujuaannartitsineq tunngavigalugu ineriariortitsinissamut tunngavissat 17-iusut sammivaat. Suleqatigiissitsinerullu ingerlanerani aamma ilisaritinneqarpoq Namminersorlutik Oqartussat maanna suliniutigisaat ingerlanneqartut, nunatsinni anguniakkat 17-iusut pineqartut aallaavigalugit ingerlanniarnissaannut nunatsinnut atatillugu qulaajaaniarnerusut.
Aningaasaqarnermut Naalakkersuisoqarfik saqqummiinermi ingerlatsisuuvoq, suliniaqatigiiffippassuillu anguniakkat17-iusut pillugit oqaloqatigiinnerulernissamut aggersarlugit.
Suleqatigiissitsinerup kingorna peqataasut oqaatigaat, nunarsuaq tamakkerlugu anguniagassat ataatsimoorluni suleqatigiissutiginissaat pingaartuusoq ingerlanneqaqqittariaqartorlu. Peqataasullu isumaqatigiissutigivaat anguniakkat pineqartut 17-iusut suliniaqatigiiffinnit ataatsimoorussassaqqissuusut – aammalu allanik nutaanik suleqatissarsiornissami tunngavissaqqissuusut.
Nunarsuaq tamakkerlugu anguniakkat 17-it FN-imi 2015-imi septemberip qaammataani akuerineqarput nunarsuarmilu nunanut tamanut atuutsinneqalerlutik. Anguniakkat tassaapput; piitsuunermik nungusaanissaq, assigiinngissutsinik nalimmassaaniarnissaq, pitsaasumik ilinniarsinnaanissanik siammarsaanissaq, kiisalu peqqissutsimik, pilluarnermik naligiissitaanermillu siammartiterinissaq, Anguniakkat kalaallisuunngortinneqarnikuupput FN-imiillu nutsikkat pisortatigoortumik akuerineqarsimallutik.
Annertunerusumik paasisaqarumasut saaffiginneqquneqarput ukununnga: siulittaasoq Anita Hoffer, Transparency International Grønland (58 45 30) imal. Allattoqarfimmi pisortaq Lotte Kirkegaard, CSR Greenland (36 37 16).
Paasinarsaasiat:
Paasinarsaasiaq: Aviâja Lynge Kalaallit Nunaanni Kræftimik Akiuiniaqatigiiffimmeersuusoq nunarsuaq tamakkerlugu anguniakkat 17-iusut suliniaqatigiffimmut sumiiffinnilu ataasiakkaani immikkoortortaqarfiinut atatillugu tulleriiaarneqarnissaat suliarivaa.
Paasinarsaasiaq: Nunarsuaq tamakkerlugu anguniakkat 17-iusut pisortatigoortumik akuerisaasumik kalaallisuunngortillugit nutserneqarnikuupput.
Ataani takuneqarsinnaavoq saqqummiinermi Powerpoint-i.
