Immitsinnut pisuunerulersippugut
Suliffeqarfiit pisortallu ingerlatsivii suliaritinniakkaminnut atatillugu suliarinnittussarsiuussigaangamik pilersuisinnaasut minnerit aamma eqqarsaatigisassavaat suliassat neqerooruteqarsinnaaleqqullugit. Aammalu eqqumaffigineqartariaqarpoq pilersuisinnaasut suliarinnittussarsiuussinerni suleriutsinik ileqquusunillu nalinginnaanerusunik ilinniartinneqarnissaat, sumiiffiusuni pilersuisinnaasut suliarinnittussarsiuussinerit annerusut qanoq peqataaffiginissaat ilikkarniassammassuk taamallu aamma neqerooruteqartutut tiguneqarnissamut periarfissagissaarneruleqqullugit.
Tamakkulu tassaapput inassutigineqartut quliusut iluini marluk kalaallit suliffeqarfiinit 20-iusunut ilisaritinneqarlutillu oqallisigineqartut, Namminersorlutik Oqartussat Kommuneqarfik Sermersoorlu inassutinik, saqqummiussinermut atatillugu ippassaq isumasioqatigiissitsimmata. Inassuteqaatit suliniutip “Akisussaassuseqartumik pisiniartarnissaq pillugu oqallittarfik” Nunatsinni Sulisitsisunit, CSR Greenlandimit Transparency International Greenlandimillu aallartinneqartup pilersinneqarneranit pinngortuupput. Suliunummillu aallartitsisuusut Nammineerlutik Oqartussat, Kommuneqarfik Sermersooq, TELE-POST, Nukissiorfiit aamma Pisiffik peqatigalugit inassutaasut ilusilersornikuuaat.
Suliniummi aallaaviuvoq, peqataasunut tamanut – pisiniartartunut, pilersuisunut, pisortaat oqartussaaffeqarfiinnut, namminersorlutik suliffeqarfinnut minnerunngitsumillu inuiaqatigiinnut – iluaqutaassammat oqaloqatigiinnerusarutta suleqatigiissutigalugulu pisiniartarnerit amerlanerit nunatsinni pisalernissaat. Ilami tamarmik isumaqatigaat, pitsaasuusoq isumannaarsinnaagutsigu aningaasat pisariaqarnerpaat avataasigut nunatsinnit aningaasanik aniatinneqarunnaarpata. Tamannami aningaasaqarneq eqqarsaatigalugu isumatuumik eqqarsarneruvoq: Sumiiffiusunimi pisiniarnerit sumiiffiusuni annertunerusumik aningaasanik kaaviaartitsissapput, amerlanerusunik suliffissaqartitsilerlutik aammalu ineriartortitsinermik pilersitsissallutik – aammalu sumiiffiusuni nutaanik inuussutissarsiutinik periarfissiissallutik.
Brian Buus Pedersen, Nunatsinni Sulisitsisuni pisortaasoq oqarpoq: “Oqalliseqataasut tamarmik isumaqatigaat sumiiffigisani pisiniartarnerup siuarsarneqarnissaa, aqqutissaasoq tamatta pisuujunerulernissatsinnut. Tamatumalu takutippaa tikkuinnarluta isiginnaaginnarata suut tamaasa akimorlugit suleqatigiissinnaasugut ataatsimoorluta anguniagassamut ingerlajumalluta”.
Pingasunngormat ullup qeqqata siorna Namminersorlutik Oqartussat Kommuneqarfik Sermersoorlu, suliffeqarfippassuit aggiasimasut aallartitsisuusullu pingasuusut Nunatsinni Sulisitsisut, Transparency International Greenland aamma CSR Greenland peqatigalugit periarfissaqalerput inassutigineqartut quliusut sukumiisumik oqaloqatigiissutigissallugit tunngassuteqartullu allat ilanngullugit. Naliliinerlu tassaalerpoq, inassutigineqartut siammasissumik isumaqatigineqartut aammalu tusaalluarneqartoq taamaallaat iluatsittumik ingerlasoqarsinnaasoq kikkut tamarmik akisussaaqataanermik tigusiumappata oqaloqatigiinnerlu uummaaritsillugu.
Anita Hoffer, Transparency International Greenlandimi siulersuisuni siulittaasuusoq oqarpoq: ”Nuanneqaq peqataasut sumiiffigisani pisisarnerup annertusarnissaanut iluatsittumik ingerlasoqassappat qanoq ingerlatsinissaq pillugu isumaqatigiilluartut takullugit. Immikkullu nuannaarutigaara suliarinnittussarsiuussinermi periutsit ammasuusut aammalu inassutigineqartuni naligiimmik pineqarnissap isumannaatsuunissaa annertuumik pingaartinneqartoq takullugit”.
Inassutaasut uani aaneqarsinnaapput: Akisussaassuseqartumik pisiniartarneq pillugu oqallittarfik
Oqaasissaqartut apeqqutissaqartullu saaffiginneqquneqarput ukununnga: Brian Buus Pedersen, Nunatsinni Sulisitsisuni (GE) pisortaasoq: 363710, Lotte Frank Kirkegaard, CSR Greenlandimi allattoqarfimmi pisortaq: 363716 imal. Anita Hoffer, Transparency International Greenlanimi siulersuisuni siulittaasoq: 584530.
Assitaliussat:
Assilisaq: GE-ip illuani oqallinnermi najuuttut inassutigineqartut quliusut oqallisigivaat.
Assilisaq: Anita Hoffer, Transparency International Greenlandimi siulittaasoq ataatsimiinnermi allattuisoq.
Uani atuakkit akisussaassuseqartumik Pisiniartarnissamut Oqallittarfimmit Inassutigineqartut quliusut: Imatut iliorluta Kalaallit Nunaanni sumiiffigisani annertunerusumik pisiniartarneq pilersissavarput.
