TUSAGASSIUTITIGUT NALUNAARUT: QAQISA!-mut piginnittuuneq ataatsimoorluni pilersitaasoq

Atuarfeqarnermut atatillugu annertunerusumik siunnertaqarnermik misigisimaneq  aammalu inuusuttut amerlanerit ilinniarusulersinnissaannik ataatsimoorluni nukittuumik suleqatigeerusunneq malunnarpoq, CSR Greenlandimit QAQISA! – atuarfiit-suliffeqarfiit suleqatigiinnissaannik ilitsersuusiaq– Sulisitsisut allaffeqarfiani ulloq 29. maj 2018 ilisaritinneqarmat.

Atuarfeqarnermut atatillugu soqutigisaqaqatigiit tamarmiusut najuupput, soorlu ilinniartitsisut, siunnersuisartut, atuarfinni pisortaasut, aqutsisoqarfinni aqutsisut, ilinniartitaanermut aqutsisoqarfimmeersut aammalu Ilinniartitaanermut Naalakkersuisoq. Aamma CSR Greenlandimi ilaasortat amerlasuut peqataapput. Ilisarititsinerlu internetikkut sinerissami aallakaatinneqarpoq, Narsami Qaqortumilu malinnaavigineqarluartumik.

“Ukiuni 14-it missingini atuarfimmi siunnersuisartuuvunga aatsaallu siullerpaamik, kalaallit oqaatsigut atorlugit atugassianik, nunatsinni tamarmi atuarfinni atorneqarsinnaasunik, saqqummiussisoqarpoq. Tamanna iluarisimaaqaara suliniullu assut nuannaarutigalugu. Neriuppungalu siunissami, meeqqanut kalaallinut ilinniartitsinermi atorsinnaasatsinnik, sakkussanik saqqummiussisoqaqqittarumaartoq.” Otto Albrechtsen, atuarfimmi Ukaliusami atuarfimmi siunnersuisartuusoq, Qaqisa!-mik ilisarititsinermi, oqarpoq.

Soorli ataatsimoorussassamik pilersaarusiussaagut, ulluinnarni suliarisartagareriikkatta avataatigut ingerlanneqartussamik?

“Pineqarput meeqqat. Meeqammiuku qitiutitassaasut. Suliniuteqarpugut, meeqqat sapinngisamik pitsaanerpaamik sullikkumallugit. Aporfiit piiaartariaqarpagut unittoorutiginagit – meeqqammiuku iliuuseqarfigerusukkigut.  Aporfeerarpassuit piiartigit, suliniullu ingerlatiinnarlugu, siunissaq isigalugu, salliutillugit iluaqusiisinnaa-sussat. ”Suliffeqarfiit atuarfinnut – Atuarfiit suliffeqarfinnut”-mik taallugu siullermeersumik ingerlanne-qartumi ataqatigiissaaraluni tigumminnittuusoq Niels-Anthon Petersen, siusinnerusukkut Grønlands-BANKENip Aasianni immikkoortortaqarfiani pisortaasimasoq, oqarpoq.

Peqataasut ilarpassui ingerlanneqartumi taaneqartumi peqataasimapput, tassani misilittakkaminnik, unamminartut pillugit aammalu ingerlatap iluatinnaatai pillugit immersueqataasimallutik, pisumilu naqissuserpaat atuartut meeqqat atuarfianni naammassigaangamik ilinniaqqikkusulersinnissaannik kajumissarlugit suliniuteqarnermi suleqataaqqikkusukkamik.

Suulli pisariaqarpat siunnerfik anguneqassappat?

“Qaqisa! Iluatsittumik ingerlassappat, taava sumiiffinni pisortaasut ikorfartuinissaat pisariaqarpoq. Pingaartorujussuuvormi, qullerpaajullutik  aqutsisut tunuliaqutsiillutik tapersersuinissaat, taamatummi pisoqarpat ingerlanniagaq ingerlakkuminarnerujussuulissammat.” , Susanne Christensen, KNB-mi pisortaasoq oqarpoq. Paamiunimi KNB siullermeersumik ingerlatsinermi peqataavoq.

”Suleqatigiissinnaassuserput aaliangiilluinnartuuvoq, iliuuseqarsinnaanissatsinnut. Ilami aaliangiilluin-nartuuvoq pisortarisat sinaakkusiillutillu aqqutissanik tikkuussisarnissaat. Taaneqartut suleqatigiissin-neqarpata – taava anguniakkamut aqqutissaq erseqqississaaq, taamatullu pisoqarpat atugassat nukissallu pisariaqartinneqartut piulissapput – aamma sumiiffinni mikinerusuni. Taava taamaattuni aamma kivitsineq pisinnaalissaq. Tamannalu pisinnaammat qularinngilara”, Lotte Frank Kirkegaard, QAQISA!-mik pilersaarusiornermi pisortaasoq CSR Greenlandillu allattoqarfiani pisortaasoq, oqarpoq.

Suut maanna pilersaarutigineqarpat?

CSR Greenland meeqqat atuarfiit aallartitserusuttut aallartinniarnerini piareersimasuullunilu ikiuuttassaaq. Taamatuttaaq aamma suliffeqarfiit, suliniuteqaqataajumasut ikiussallugit piareersimaffigineqassapput. Allattoqarfiullu QAQISA!-p  ukiuni pingasuni ingerlasinnaanissamut aningaasassarsiorneq maanna ingerlappaai, taamatut periarfissiinikkut meeqqat atuarfii amerlanerusut angusinnaalerumallugit.

”QAQISA! SUNUT KIKKUNNULLU TAMANUT siammaanniarneqassaaq. Taamatut angusaqarniarnermi suliffeqarfiit angajoqqaallu kisimik pineqanngillat. Kikkulli tamat QAQISA-p suliarititaasa suunerinik ilisimasaqalersinniarneqassapput. Kissaatigeqaarpullu kommunit paasinninnissaq angujumallugu siammartitereqataajumaarumaarnissaat. KIKKUMMI TAMARMIK QAQISA! suusoq paasisariaqarpaat”, Rena Kriegel Mikkelsen, Hans Lyngep Atuarfiani siunnersuisartuuoq oqarpoq.

Ilitsersuusiaq atuarfinnut tamanut nasiussuunneqarpoq aammalu uani aaneqarsinnaalluni.

QAQISA! – atuarfiit suliffeqarfiillu suleqatigiinnissaannut ilitsersuusiaq aningaasaateqarfimmit Bikubenfonden-imit tapersigaavoq.

Sukumiinerusunillu paasisaqarusuttut saaffigisinnaavaat QAQISA!-mik pilersaarusioqatigiit siulittaasuat Michael Binzer, oqarasuaat  54 87 00 aqqutigalugu imal. allallutik uunga:  mik@visiobox.gl.

Assimi takuneqarsinnaavoq QAQISA!-P ilisaritinneqarnerani peqataasut aamma Niels-Anthon Petersen saqqummiussisoq.