Illoqarfiit tallimat kajumissutsimillu ikiuuttorpassuit Saligaatsoq saleeqatigaat
Ileqqunngoraluttuinnarpoq Saligaatsoq – Suliffeqarfiit saliinerat illoqarfippassuarni ingerlanneqartarnera. Saligaatsoq tassaavoq suliffeqarfiit saliinerat, ukioq mannalu Nuummi tamanna arfineq-pingajussaa ingerlanneqarpoq, saliinerlu aamma Ilulissani, Aasianni, Sisimiuni Maniitsumilu aamma angusaqarluarfiusumik ingerlanneqarsimalluni.
Ilulissani juunip arfineq-aappaat Saligaatsoq ingerlanneqarpoq, tassanilu suliffeqarfiit 16-it saliisullu 80-it peqataapput. Eqqagassat 15 m3-isut annertutigisut tonsinngorlugulu 15-18 tonsitut oqimaassusillit katersorneqarsimapput. Ilulissani Saligaatsumik ingerlatsisoq, Ilannguaq Møller, INI A/S-iminngaanneersup saliineq ingerlalluartutut nalilerpaa.
Juunip 12-iani INI A/S Sisimiut aamma peqataasorpassuaqarluni saliisitsivoq. Saligaatsumilu saliisitsisoqartarnerani Sisimiut ukiut arlerpaat peqataasarluni.
Saligaatsoq Maniitsumi Nuummilu juunip 14-iani ingerlanneqarpoq. Ulloq taanna sila masannartulioraluartoq peqataasut sila soqutiginagu peqataasut saliipput, pinngortitamilu saliiffiusumi eqqagassat 4 tonsit katersorneqarsimallutik. Ukioq manna Maniitsoq siullermeerluni Saligaatsumi peqataavoq, ukiup tullianilu aamma peqataaqqinniarluni.
Ukioq manna Nuumminngaanniit saliisut 450-500-jut missaanni amerlassuseqarput, ukioq kingullermullu sanilliullugu peqataasut ikinnerumaarput, ukioq kingullermi peqataasut amerlanerpaaffimminniissimammata (600-jut missaat peqataasimammata). Peqataasut ikileriaateqarsimanerannut peqqutaaqataasinnaavoq, Saligaatsup ingerlanniarneqarnerata nalaani Pan Am ingerlanneqarmat, tassanimi aamma kajumissutsimik ikiuuttussanik pisariaqartitsisoqarsimammat. Silarlussimaneralu peqqutaqataasinnaasut ilagaat, suliffeqarfiimmi arlallit peqataanissaraluartik taamaatiinnarsimammassuk saliinissartilluunniit ullormut allamut nuutsissimammassuk.
Suliniutillu aallartinnerani aamma teknikkitigut ajornartorsiuteqarsimavugut, peqataaniarlutik nalunaaruteqartut pissusissamisoortumik apuunneq ajorsimammata, qujanartumilli tamanna aaqqiissuteqarfigaarput. Taamaattoqarnerata kingunerivaa ullormi saliiffiusussami peqataaniarlutik nalunaartut arlaqarsimaneri. Nalunaaruteqartoqarnerullu takutippaa pinngortitatta saligaatsuunissaa qanoq pingaaruteqartiginersoq.
Aasianni arfininngormat Saligaatsoq peqataaffigineqarluarsimasoq ingerlanneqarpoq. Saliineq ima ingerlalluarsimatigaaq bilinik eqqakkanik aallertartut malinnaasinnaasimanatik, allaat aqaguani eqqakkanik katersinertik ingerlateqqittariaqarsimallugu.
Facebookikkut nittarsaassineq saliisussanik amerlanerusunik kajumissuseqalersitsivoq
Ukioq manna Saligaatsoq Facebookikkut malinnaavigineqarluarsimavoq unammisitsinerillu peqataaffigineqarluarsimallutik. Inuit 50-it missaanniittut namminneerlutik kajumissusertik atorlugu Ilulissani, Sisimiuni, Nuummi, Paamiuni, Qaqortumi Nanortalimmilu pinngortitami saliisimapput. Saligaatsup Facebookikkut quppernerani suliffeqarfiit assigiiinngitsut eqqugassanik tapersersuinerannit assigiinngitsunik unammisitsisimavugut, tassuunalu aamma nuna tamakkerlugu imaanut plastikkinik eqqaasarneq pillugu paasititsiniaasimalluta. Ukioq manna ukiup aappassaa imaanut plastikkinik eqqaasarnerup sunniutigisartagai sammineqarput.
Neriuppugut saliisitsisarneq ukiut tamaasa Kalaallit Nunaanni illoqarfinnut nunaqarfinnullu amerlanerusunut siaruartassasoq. Saligaatsumilu – imaluunniit Saligaatsumiunngitsoq, pingaarnerpaaq tassaavoq illoqarfiit nunaqarfiillu namminneerlutik akisussaasuummata illoqarfigisami nunaqarfigisamilu nunataani saligaatsuunissamut. Tasiilamilu juunip 13-iani akisussaaffimik tigusisoqarsimavoq, tassami innuttaasut 300-rut missaannik amerlassusillik illoqarfigisaminni saliisimammata. Namminneerlutik misigisimapput suli saliisoqaqqissinnaasoq, taamaammallu sapaatip akunnera qaangiummat saleeqqissimallutik. Tassa taanna avatangiisimut eqqarsaatiginninneq kikkunnut tamanut siaruartikkusutarput!
Soorunami pilersaarusiornermi peqataasut, tapersersuisut, saliisut, biilertut, kajumissutsiminnik ikiuuttut meeqqallu angajoqqaaminnik saleeqateqartut tamarmik qujaffigaagut – siunissatsinnut oqariartuut pingaaruteqaqisoq ingerlateqqipparput.
