Ini A/S nunarsuarmi anguniagassanut tapiisoq
Aggustip 14-iani CSR Greenland Nunarsuarmi anguniagassat pillugit pikkorissartitsivoq, pikkorissartitsinerullu siunertarivaa Nunarsuarmi anguniagassat pillugit ilisimasanik nutaanik atorneqarsinnaasunillu paasissutissiineq, ilisimasallu taakkua suliffeqarfinni tigussaasumik qanoq atorneqarsinnaaneri.
FN-ip Nunarsuarmi anguniagassatut siunniussaat 2015-imi atuutsinneqalerput. Anguniagassat 17-inik amerlassuseqarput tassanilu siunnersuutigineqarpoq suliffeqarfiit kattuffiillu anguniagassaasut ilaat ulluinnarni sulinerminni anguniassagaat.
Nunarsuarmi anguniarneqartut pillugit sulissuteqarniartut ilaat, Melissa Geisler Krogsgaard, INI A/S-iminngaanneersoq pikkorissaqataasorlu taama oqarpoq:
Ulluinnarni peqqissutsimut ambassadørigut peqatigalugit ulluinnarni peqqissuunissarput ilorrisimaarnissarpullu eqqarsaatigisarparput.
INI A/S-ip allattoqarfiani aqutsisoqarfianilu suiaassutsit tunngavigalugit agguaqatigiittoqarnissaa sulissutigineqarpoq. Anguniagaavoq 50/50 anguneqarnissaa. Aqutsisoqatigiinni suiaassutsit tunngavigalugit agguaqatigiinnerit INI A/S-ip ukiumut nalunaarusiaani takussutissaqarpoq (ullumikkut allattoqarfimmi arnat marluk angutillu marluk sulipput, nittartakkatsinni allattoqarfimmi sulisut nassaarineqarsinnaapput).
Akiitsoqarneq pillugu kiisalu najugaqartut oqartussaaqataalersinneqarnissaannut kissaateqarnermi oqaloqatigiinnerni peqataanissarput akisussaaffittut isigaarput. Kisermaassilluta inuiaqatigiinni ajornartorsiutit aaqqiiffigisinnaanngilagut, kisiannilu kommuneqarfiit Namminersorlutillu Oqartussat tatigeqatigiinnertalimmik suleqatigisinnaavagut, taakkuuppummi Kalaallit Nunaanni inuuniarnerup iluani ajornartorsiutinut aaqqiissuteqartussatut inissisimasut. Aningaasaqarneq pillugu siunnersuineq eqqarsaatigalugu misiliutitut misilittaanermi qitiusumik inissisimavugut (Kommune Kujalleq). Eqqumaffigaarput najugaqartut oqartussaaqataalersinneqarnissaat qanoq ineriartortitsisinnaalluta, najugallillu najugaqarniarneranni akisussaaffimmik annertunerusumik tigummisaqalersinnaanerannut nutaamik eqqarsarsinnaassuseqarpugut. Ukioq manna najugaqartut oqartussaaqataalersinneqarnissaat ukkatarisimavarput, tamannalu ingerlassimavarput Ilulissani pingasunik nutaanik najugalinnut oqalliffeqalernikkut kiisalu TV-kkut najugallit oqartussaaqataalersinneqarnissaat pillugu paasissutissiissuteqartarpugut kiisalu najugallit najugaqarfinni siulersuisunut ilanngunnissamut kaammattuutigisarlugu.
Angerlarsimaffinni avatangiisitta paarinerunissaanut iliuuserineqarsinnaasut pillugit suliaqaqataarusuppugut. Assersutigalugu maanna Nuummi najugaqarfinni assigiinngitsuni eqqaaveqarfiit nutarteqqammerpagut, eqqaaveqarfinnilu maanna periarfissaalerput eqqagassat immikkoortiterneqarsinnaaneri. Saliineq ingerlattarparput, taassumalu siunertaraa najugaqarfinni siulersuisut peqatigalugit najugaqarfiit nalaanni saliineq. Ukiullu tamaasa Nuummi Saligaatsup ingerlanneqarnerani peqataajuaannarluta, periarfissaatillugu illoqarfinni allani aamma peqataasarpugut. Ukioq manna INI A/S Ilulissani Sisimiunilu Saligaatsumi peqataatitsivoq.
Kiffartuussissutinik nioqqutissanillu pisisarnerput eqqarsaatigalugu akisussaaffipput qanoq inissisimanersoq ilisimaarinniffigaarput. Aningaasatigut ajornaquteqanngitsillugu Kalaallit Nunaanni niuernissarput piumanerusarparput. Kiffartuussissutinik nioqqutissanillu pisisarnerput Kalaallit Nunaanni ineriartornermut suliffeqarniarnermullu ineriartortitseqataassaaq, taamaattumik piukkunnartussarsiorneq aqqutigalugu niuerniartarfitsinnut piumasaqartarpugut, assersuutigalugu teknikkinut tunngatillugu niuertarfitsinnut ilaatigut piumasaqaatigisarparput ilinniarfinnik pilersitsinissaat kiisalu oqartussaqarfinnut akiitsoqannginnissaat.
INI A/S-imi ileqqorlunnerup akiorneqarnissaanut akisussaaffeqarpugut. Tamannalu anguniarlugu suliffeqarfiup iluani assigiissaartumik ersaarissumillu suliffeqarfimmi ingerlatseriaaseqarpugut, ilaatigut akiligassat sulisunit arlalinnik akuerineqaqqaarlutik akilerneqartarput, suliffeqarfiullu avataatigut Transparency International Greenlandimi ilaasortaalluta.
CSR Greenlandimit kissaatigineqarpoq suliffeqarfiit ulluinnarni sulinerminni Nunarsuarmi anguniagassat pillugit siunissami sulissuteqartarnissaat.
Nunarsuarmi anguniagassat pillugu uani atuaqqissinnaavutit.
Pikkorissaasoqarnerani PowerPointsit atorneqartut uani aaneqarsinnaapput.
