Aajap suliffeqarfiit CSR Greenlandilu nersualaarai
Aviisimi allaatigisaq una CSR Greenlandimi ataatsimiinnermi oqalugiaammit tigusaavoq FN-ip nunarsuarmut anguniagaani 2030-mut tunngasumut ilaalluni, tassaasoq atasinnaasumik anguniakkani, augustip 15-ani 2018-imi Nuummi ingerlanneqartumit naalisagaalluni, soorlu aamma uanga nammineq ataatsimiinnerup kingorna eqqarsaatersuutikka ilanngunneqarnikuullutik.
CSR Greenlandi aamma Kalaallit Nunaanni suliffeqarfiit inooqatigiinni akisussaaffimmik tigusinermut tunngatillugu suliaat ajunngilluinnarput. Imaappormi nunarsuarmut qiviaraanni suliffeqarfiillu allat tusarfigigaanni misiginartarami inuit ukkatarisaat tassaasoq iluanaarniarneq. Inuiaqatigiinni inuussutissarsiornerullu iluani iluarsiniaaneq pineqarnani. Kalaallit Nunaannili suliffeqarfiit arlallit ukiut tallimat-qulillu iluanni CSR atornerulernikuuaat.
Uanga misigaanga Kalaallit Nunaanni inuussutissarsiornerup iluani suliffeqarfiit CSR-i atorlugu ingerlatsinerusartut – politikkeriunngitsut. Uanga isumaqarpunga tamanna uggornarluinnartoq, ilami qaninnerusumik ataqatigiinnerusumillu sulisoqarsinnaagaluarami. Tamattami kivitseqatigiikkaangatta angusaqarnerusaratta. Sammisat silaannap allanngoriartorneranit tamakkiisumik inuiaqatigiinni unammillernartunut tunngasinnaasarput.
Sapiinnikkut, tulleriiaarinikkut iliuuseqarnikkullu nunarsuarmut ajunnginnerusumut tapeeqataasinnaavugut
FN-imi nunarsuarmut anguniakkanut ataqatigiinnermut tunngapput. Meeqqat atuarfiinik qaffassaanermut tunngassuteqarpoq tamatta suliffeqarfik pitsanngorsarniassagatsigu. Inooqatigiinnut politikki aamma inooqatigiit akornanni kisimi atorneqannginnissaanut tunngassuteqarpoq. Inooqatigiinni politikki aamma sulinermut politikkimut, ineqarnermut politikkimut ilinniarnermullu politikkimut tunngassuteqarsinnaavoq. Inuiaqatigiinni ajornartorsiutit unitsinniarutsigit kingumut qiviartariaqarpugut. Qanoq isilluta amerlanerit sulilersissinnaavagut, angerlarsimaffeqalersillugit ilinnialersillugillu?
Ukiuni kingullerni inunnut pisinnaatitaaffinnut tunngasunut peqatigiiffeqarnerulernikuuvugut. MIO, Tilioq aamma Inunnut pisinnaatitaaffinnut Grønlands Råd-i. Taakku ajunngitsumik pingaaruteqartumillu suliaqarput. Peqatigiiffiit piumassutsiminnik sulisut, soorlu aamma NGO-t ilagalugit ilissi aamma inuit pisinnaatitaaffii pingaarnerit atuutsinneqarnissai ataqqineqarnissaallu sulissutigaasi. Maanna nunatsinni malinnaalluta takutitsilluarnissarput piffissanngorpoq.
Naalakkersuisut inuit pisinnaatitaaffiinut pitsanngorsaallutik sulineri, soorlu aamma FN-imi nunarsuarmi anguniakkanut suleqataaneri malinnaaffiginissaanut qilanaarpunga.
Aviisimi allaatigisaq uani atuarneqarsinnaavoq.
