Saligaatsoq suli ingerlavoq
Ataani atuarsinnaavat Saligaatsoq Uummannami, Ilulissani Nanortalimmilu qanoq ingerlasimanersoq.
Saligaatsoq Uummannaq
Uummannami ataqatigiissaarisoq Kaaleeraq Grønvold innuttaasut peqatigalugit saliisitsineq iluatsilluartutut nalilerpaa. Uummannami illoqarfiup tikikkuminartuunissaanut torersaanerit allallu ingerlattuarneqarput, qujanartumillu ikioqatigiittaarnikkut suliffeqarfiit innuttaasullu suleqatigiilluartarput.
Saligaatsoq Ilulissat
Saligaatsortitsinermi suliffeqarfiit takkuttut ikioqatigiilluarnikkut angusat iluatsilluartutut ataqatigiissaarisup Karl Mølgaardip oqaatigaa.
Ilulissani angusat:
Naliginnaasut biilit last-illit katersuinermi katillugit ikuallaavimmut assartorsimavaat = 317 m3
Suliffeqarfiit Lastbiliutaannik ikuallaavimmut katillugit assartorneqarsimapput = 149 m3
Puussiat saleeqataasunik aqquserngup sinaanut ilisat assartorneqarsimapput = 122 m3
“Saliisitsinerput tullianimut qanoq pittaanerusinnaanersoq oqaluuserisassaqqittorujuungaluarpoq. Peqataasut amerlavallaanngikkaluartut ataatsimut angusaq kusanartoq iluatsilluartorlu oqaatigisinnaavara” Karl naggaserpoq.
Saligaatsoq Nanortalik
Nanortalimmi Brugsenimi sulisut Saligaatsumut peqataarusullutik pisiniarfiup eqqaa salissimavaat.
Saligaatsoq Ittoqqortoormiit aggustip 14-ani ingerlanneqartussaq nutaarsiassani tulliuttuni atuarneqarsinnaajumaarpoq.
