CSR Greenland soqutigisaqaqatigiit pisortanit namminersortuniillu peqataaffigineqartut suleqatigalugit misissuinermik ingerlatsivoq. Suleqatigiit Kalaallit Nunaanni eqqakkanik suliaqarnermut maanna pissutsit misissuinerminni qulaajarlugit ingerlappaat aammalu eqqaavissuit annertussusaasa annikillisarnissaat, eqqakkanik immikkoortiterinerup pitsanngorsarnissaa kiisalu eqqakkanik ulorianartunik pitsaanerusumik passussinissamut periarfissat sammivaat.

Kalaallit Nunaanni eqqakkat pillugit ajornartorsiutit annertuut aammalu pisariusut misissuinerup takutippaa. Aaqqissuussaanermi pissutsit avinngarusimasut soorlu inoqarfiit isorartuut, assartuinerup ajornakusoornera aammalu silap sakkortusinnaanera eqqakkanik aqutsinermi pitsanngorsaanissamut aporfiupput.

Peqatigisaannik ingerlaannaq aallartinneqarsinnaasunik iliuuseqarnikkut soorlu paasissutissiineq, ilinniartitsineq, pitsaanerusumik immikkoortiterineq aammalu assartuinermi logistik-imik pitsanngorsaaneq aqqutigalugit annertuunik pitsanngorsaanissamut periarfissaqartoq misissuinerup takutippaa. Piffissamut ungasinnerusumut isiginninneq, suleqatigiinnerit, piginnaasanik ineriartortitsineq aammalu siusissukkut ersarissunik angusaqarnerit ukkataralugit suliniuteqarneq ataavartumik pitsanngorsaanissamut pingaaruteqartuussasut misissuinerup takutippaa.

Misissuinermi suleqataasut, eqqavissuarnik annikillisaaneq, eqqakkanik eqqortumik immikkoortiterinerup siuarsarnissaa, eqqakkanik ulorianartunik passussinerup pitsanngorsarnissaa aammalu nuna tamakkerlugu eqqakkanik suliassaqarfimmi piginnaasanik ataavartunik pilersitsinissaq siunertaralugu suliniut annertunerusoq aallartinneqassasoq inassutigaat. Suliniut tigussaasumik ingerlanneqartariaqarpoq, siusissukkut angusanik ersarissunik aammalu najukkani, pingaartumik nunaqarfinni, tulluusimaarinninnermik peqataatitsinermillu pilersitsisumik imaqartariaqartoq inassutigineqarpoq.

Suleqatigiit isumaqarput Kalaallit Nunaat avatangiisinut akisussaaffeqartumik eqqakkanik aqutsinermut alloriarnernik pingaaruteqartunik tigusisinnaasoq – avatangiisinut, innuttaasut peqqissusaannut aammalu nunatta nunarsuarmi isigineqarneranut iluaqutaasumik.

Inerniliineq pingaarneq tassaavoq Kalaallit Nunaanni eqqakkat pillugit ajornartorsiut annertooq, pisariusoq aammalu anguniagaqarfiusumik sivisuumillu suliniuteqarfiusariaqartoq. Infrastrukturip amigaatigineqarnera, assartuinermi aningaasartuutit qaffasissut, naammattumik immikkoortiterinnginneq, aqutsinermi siammarsimasumik malittarisassanik atuutsitsiniarneq aammalu innuttaasuni inuussutissarsiutinilu ilisimasaqarnerup killeqarnera pitsanngorsaanissamut aporfiupput.

Misissuinerup takutippaa inuussutissarsiortut, Namminersorlutik Oqartussat kommunillu akornanni aaqqiissutissanik ujartuinermi peqataarusussuseq annertusoq. Suleqatigiinnerit, piginnaasanik ineriartortitsineq, eqqakkanut ulorianartunik immikkut suliniutit aammalu najukkami pisariaqartitanut naleqqussakkat infrastruktuurinik ineriartortitsineq aqqutigalugit pitsanngorsaanissamut periarfissaqartoq misissuinerup takutippaa.

Suna paasivarput?
Misissuinerup takutippaa siullermik pitsanngorsaatit anginerpaat makkunatigut anguneqarsinnaasut:

• Innuttaasunut suliffeqarfinnullu paasissutissiineq ilisimasaqarnerulersitsinerlu.
• Tamanut ilinniartitsineq piginnaasanillu ineriartortitsineq.
• Eqqakkanik sumiiffimmi immikkoortiterinermi pitsanngorsaaneq.
• Eqqakkanik aallertarnermi assartuinermilu aaqqissuussanik pitsaasunik ineriartortitsineq.

Anguniagaq tassaavoq ikuallaavinni pioreersuni periarfissat pitsaanerpaamik atorneqarnissaat – tamannalu eqqakkat eqqortumik immikkoortiterneqarnissaat pisariaqarpoq, taamaattumik ikuallassinnaasut kisimik ikuallaavimmut apuunneqassallutik. Ulluinnarni atorneqarsinnaasumik eqqakkat pillugit ileqqunik ineriartortitsisoqassaaq, kingusinnerusukkut aaqqiissutissanut siuarsimanerusunut soorlu kaaviiaartumik aningaasaqarnermut ingerlaarnissamut tunngavissiisumik.

Eqqakkanik immikkoortiterineq, eqqaavissuarnut inissiisarnerup annikillisarnissaa aammalu piginnaasanik ineriartortitsineq pillugit periusissat ataatsimut atorsinnaasut

Anguniakkat pingaarnerit anguneqassappata makku periusissatut ataatsimut atorneqarsinnaasut inassutigineqarput:

• Eqqakkanik immikkoortiterineq: Ataatsimoorussamik, atuisunut naleqqussakkamik immikkoortitereriaatsinik ineriartortitsineq, paasissutissiinermik ilaqartinneqartoq. Ataatsimoorussamik immikkoortiterinermi najoqqutassat, digitalimik aaqqiissutissat atoruminarnerusut aammalu assitalersukkanik qalipaatilinnik innuttaasut suliffeqarfiillu immikkoortiterinerannik oqilisaataasussanik.
• Eqqaavissuarnik annikillisaaneq: Aningaasaliineq nunaqarfinnut inoqarfinnullu mikinernut ukioq kaajallallugu atorneqarsinnaasunik immikkoortiterivinnik nuukkuminartunik aallertarnerillu pisariitsut.
• Piginnaasanik ineriartortitsineq: Kommunini suliffeqarfinnilu sulisut ilinniartinneqarnissaat, innuttaasunut paasissutissiineq aammalu meeqqat atuarfiinut meeqqanullu atortussanik ineriartortitsineq, meeraanermiiy aallartittumik eqqakkat pillugit ileqqut nutaat pilersinneqassammata.
• Aningaasaqarnikkut kajumissaarutit: Atortussanut aalajangersimasunut utertitsisarnermik aaqqissuussinerit, eqqakkanik annikillisaanermik suliffeqarfinnut tapersiineq aammalu immikkoortiterinermut tunngasunik akiliuteqartitsinermi assigiinngissitsinerit atuutsinneqalernissaat siunnersuutaavoq.
• Kalaallit Nunaanni eqqakkat pillugit paasissutissanik katersuineq: Paasissutissanik pitsaanerusunik aaqqissuussaasumillu katersuineq pilersaarusiornermi nalunaarusiornermilu iluaqutaassaaq, aammalu najukkami nunalu tamakkerlugu suleqatigiinnermi ataqatigiissaarinermik pilersitsissalluni. Inuussutissarsiortunut tamanna allannguinissamut piareersimassusermik aammalu avatangiisinut silallu allanngoriartorneranut uppernarsaatinik piumasaqaataasunut naammassinnissinnaanermik nukittorsaassaaq.