Ini aamma Brugseni suleqatigiittut
Peqqinnerulernissaq pillugu sulinissamik aaliangiussinermi tamatigut malitsigisatut pisariaqalertarput kajungissutsimik attassiinnarnissaq allanillu siunnerfeqaqatigisanit ikorfartorneqarnissaq. Tamanna aamma atuuppoq suliffeqarfinnut, peqqinnarnerusumik suliffeqarfiulerumasunut.
2017-imi suli aasanngunngitsoq CSR Greenland peqqinnissaq qulequtaralugu ilaasortaminik ataatsimititsitsivoq. Kalaallit Nunaanni Brugsenimi qullersaqarfimmit suliffittut peqqinnartuunissaq aallaavigalugu sulinermi misilittakkat saqqummiussorneqarput. Ataatsimiinnermilu INI A/S peqataavoq assullu Brugsenip iluatsilluartumik ingerlassimasaanik aallaaveqartitsineq ingerlatsilernissamut kajungilersinneqarluni. Ataatsimiinnerullu kingorna INIp Brugseni saaffigivaa, isumaqatigiippullu ataatsimoorlutik sulisuminnut aaqqissuussisalerniarlutik. Qaammatillu tamaasa suliffeqarfiit pineqartut imminnut qaaqqusalerput sulisuminnut ataatsimoorlutik sammisaqartitsisalerlutik ilaatigut timigissartitsisarlutik, oqaloqatigiitsitsisarlutik allatullu nukittorsaqatigiinnermik imaqartunik sammisaqartitsisarlutik.
Pinnguarneq inuummarissitsilersarpoq
Sammitinneqartut ingerlakkuminartuusarput, allaffinni suniluunniit ingeerlanneqarsinnaasarlutik sulisut tamarmiusut peqataaffigisinnaasaannik. Ilaatigut nikissanani arpattuusaarnerusarput isikkamik tullermut tunniussuinerusarlutik, taamatullu pinnguartitsinerit siunertarisarpaat sammisaqaqatigiinnissaq suliffimmilu inuummarinnerulernissaq.
”Inassutigiumavara suliffeqarfiit naapeqatigiittarnissaat, taamatummi iliornerit nuannersuullutillu qiimanartuusarput. Ataatsimoornerimmi misigisimalersitsisarput tamatumalu malitsigisaanik qiimanerulerneq pilersarluni. Sammisaqaqatigiinnernilu oqaloqatigiinnerit pinngortarput”– Melissa Geisler Krogsgaard, Nuummi INI A/S-imi attaveqarnermut suleqataasoq oqarpoq
Ingerlanniagaq ”Suliffiit peqqissut”
KNB aamma Ini suliniutitut ingerlanneqartumi ”Suliffiit Peqqissut”-mik taaasami, ukiut pingasut matuma siorna Peqqissutsimut Naalakkersuisoqarfimmit, Kalaallit Nunaanni Timersoqatigiit Kattuffiannit CSR Greenlandimillu suleqatigiilluni aallartinneqartumi, peqataapput. Suliffeqarfiillu pineqartut marluusut taakku sulisumi akornanni septemberimi Inuummarissaasussanik ilinniartitsipput. KNB ingerlanneqartumi ilaatigut aningaasaliisuuvoq peqqinnermillu siammartiteralutik ”aallartittagassanik” 14-inik ilinniartitsilluni, Ini-lu marlunnik.
Inuummarissaasut suliassaat
Suliffeqarfittut peqqinnartuulissagaanni pingaartuuvoq suliffiusumi pisortarisanit tapersersorneqarnissaq, Inuummarissaasut suliniutiginiakkat akuerineqarsinnaaqqullugit aammalu aningaasartuutissat piffissamillu atuinissat eqqarsaatigalugit. Taamallu pisortarisanit pitsaaasumik tapersersorneqqarnissap anguniarnera maanna naammassineqartutut nalunaaqutserneqarsinnaalerpoq.
KNB illoqarfinni immikkkortortaqarfigisamini ukiumi ataatsimoorussatut ingerlanneqartussanik pilersaarusiorsimavoq. Niuertarfiilli ataasiakkaat aamma immikkut tamarmik ingerlakkusutaminnik peqqinissamut iluamillu ingerlanissamik siunertaqartunik ingerlakkusutaminnik pilersaarusiorsinnaatitaapputtaaq. INIllu Brugsenip suliai isumassarsiorfigilluarlugit nammineq aamma pilersaarusiornernik ingerlataqarpoq.
”Peqatigiiilluta ukiup ingerlanerani pisussanik pilersaarusiorpugut suliffittut ingerlaasitsinnut immikkut naleqqussagaasunik. Soorlu assersuutigalugu apummik inuusaliornernik illoqarfinni tamani piffissap ataatsip ingerlanerani unammisitsivigut tamannami ataatsimoornermik allatut misigisitsivoq ilisimaaralugu Nanortalimmi Nuummilu piffissap aaliangersimasup iluani assigiimmik sammisaqartinneqarneq ilisimaaralugulu suleqatigiit iluini ilinniartugaanni pisortaagaannilunniit assigiimmik apummik inuusaliorluni suliaqaqatigiittoqartoq” – Winnie Harder Evaldsen, Atuagassiornermut ataqatigiissaarisartuusoq oqarpoq.
”Ingerlanneqartut ilaatigut allanut pisunut katittarpagut, soorlu sulisut ataatsimut ullaakkorsiornerannut, ataatsimiinnerannut, angalanerannut allatulluunniit sulinermut atatillugu angalanerannut ilanngullugit ingelanneqartussanngortillugit. Aamma suliffeqarfiup iluani attaveqaqatigiinnermut ”tummarfeqarpugut”, tassani nivinngaanikkut allagaqarnikkullu peqqinnissamut ingerlalluarnissamullu tunngasut katersorlugit nittarssaassorsinnaallugit” – Melissa Geisler Krogsgaard, Nuummi INI A/S-imi attaveqarnermut suleqataasoq oqarpoq
Assilisani takuneqarsinnaapput
Asseq 1 & 2: KNB aamma INI sammisaqaqatigiittut
Asseq 3: INI A/S Sisimiut Inuit games-ertitsilluni unammisitsisoq
Asseq 4: Pingasunngorneq ulloq 15. november KNB illoqarfinni niuertarfeqarfigisamini tamani sulisuminik apummik inuusaliornermik unammisitsivoq.
”Suliffiit peqqissut” pillugit ilanngussat takukkit.
Qanorooq 21.09.2017: https://youtu.be/kIf_FuK5-tE?t=10m22s
Sinerissatsinniit, KNR 26.09.2017: https://youtu.be/UZvZckqSB18?t=10m41s
