Sumiiffigisani peqataatitsinerit Kalaallit Nunaanni nungusaataanngitsumik ineriartornissamut tunngavissaapput
”Nunarsuarmi allanit ilisimasassarsiornerit paasisarilikkallu pillugit atugarisaasut pitsanngorsartariaqarpagut pisullu siornisigut, ingerlanneqarnerisigut kingunerisigullu sumiiffiusuni inuiaqatigiit peqataatillugillu akuliutsittalerlugit”….”Ilaatigut misigisimasarunarpugut, ingerlanneqartut nunarsuarmi ingerlatsivinnut suliffeqarfinnullu iluaqutaanerusartut, sumiiffinnilu inuit inooqataasut ingerlanneqartut paasinerluunniit ajoraat imal. periarfissaqassanatik misissuinerit pillugit annikitsuinnannguugaluartumilluunniit paasisaqarnissamut”.
Taamatut oqarpoq Naalakkersuisoq Suka K. Frederiksen ataatsimeersuarnermi SDG in the Arctic-imi peqataagami, Local and global perspectives, Qallunaat Nunaanni allanut naalakkersuisoqarfianit 1. december 2017 ingerlanneqarmat.
Ullup ingerlanerani kingusinnerusukkut apeqqarissaartoqarmat ingerlatsisup Martin Breumip CSRimit Lotte Frank Kirkegaardimut, aamma Kalaallit Nunaanni Ilisimasassarsiornermut Siunnersuisoqatigiinni issiasoq, ilisimatusarnermi sumiiffiusuni najugaqartut qanoq akuliutsinneqartarnerat pillugu apeqquteqarpoq:
Maanna pissutsit tunngavigalugit, Kalaallit Nunaanni ilisimatusarnernit ilisimatinneqartarneq annikippallaarujussuarpoq. Kalaallit Nunaanni ingerlanneqartunut atatillugu pikkoriffiginerulertariaqarparput piumasaqaateqartarneq isumannaarumallugu, paasisat misilittagarilikkallu iluini aamma uagut pissarsisarnissarput. Ilisimasasssarsiortorpaalussuarnimmi tikittoqartarpoq, ingerlataannit pissarsiaqarfiginngisatsinnik, tassa sumiiffiusuni innuttaasut akuliutsinneqartarnerat pitsaanngimmat.
