Immikkuullarissutsit assigiinngikkaluaqisut ataatsimoorussineq
2018-imi februarimi Tasiilamut angalanermi ullorsiutini allatat.
Tikikkama assut isumalluarpunga. Aqqusernit inunnik ulikkaarput, illoqarfimmilu suliffippassuaqarpoq. atuarfinneersunik, suliffeqarfinneersunik kommunimeersunillu arlaqartunik naapitaqartussaavunga. Qanormita naapitsinissakka ingerlassappat? Ingerlanniagaq tikilluaqquneqarluassanerluni – aamma suleqatigiikkusuttoqassanerpa imal. suliffeqarfiit atuarfiillu akornanni quppaq ima silitsigaa, suleqatigiissinnaaneq ajornakusoortinneqalersinnaalluni? Ila takusat uummaarippaseqaat – taamatut takusakka siulliit tunngavigalugit aallaqqaataasumik eqqarsarpunga….
Immaqami eqqarsaatikka ullut marlussuit ingerlanerini akissutissaqalerumaarput – pissangavunga. Tasiilamiippunga ingerlanniagaq ‘Qaqisa! – atuarfiit – inuussutissarsiortut – suleqatigiissinnissaat pillugu ilitsersuusiaq’ CSR Greenlandip suliniutaa pillugu atuarfinneersunik suliffeqarfinneersunillu oqaloqatiginnikkiartorlunga. Ilitsersuusiaq aqqutigalugu atuarfiit inuussutissarsiornermillu ingerlatsisut akornanni ikaartarfiliorniarneq siunertaavoq aammalu sakkussaqarnissaq pilersikkumaneqarluni anguniarumallugu atuartut angajulliit atuarnerminnik naammassigaangamik ilinniaqqinnissamut kajungernerulersinniarnissaat…..
Tasiilamiinneralu nuannersunik ullunik misigisaqarfigaara. Atuarfiit suliffeqarfiillu isiginnittaasii, naatsorsuutiginninnerit suleriuserisaallu assigiinngitsorujussuupput. Qularutissaanngilarmi assigiinngissutsit annertusut – kisiannili maanna isumaqarpunga, soqutiginarnerpaasut tassaasut ataqatigiissutsit soqutigisaqaqatigiiffiusullu isiginiarnisaat – taakkulu siunnerfigaakka – tassa amerlanerit ilinnigaqalersinnissaat, sulliviusuni inuusuttut nuannaartut takusalernissaat, ilinniarnermik ingerlataqartut inuusuttut inuunerminnik aallartitsinissaat taamallu siunissami takorluukkaminnut makittarissaa-teqalernissaat.
Soqutiginninnerlu annertoqaaq, piumassuserlu isumassanillu annissuinerit pitsaaqaat. Aamma malunnarlu-innarpoq siunnerfik ataaseq tunaartaralugu akimut suleqatigiinnissaq kissaatigineqartoq. Naammassillungalu angerlamut saallunga aallarama nuannaaqaanga, nuannaarutigalugu inuit ammasut, ilumoortut tunniussassaqarluartullu naapikkakkit. Tikikkamalu nassarpakka ilitsersuusiamut atatillugu ilanngussorneqarsinnaasut, atuartut allat nunarput tamakkerlugu iluaqutigilersinnaasaat. Tamakkulu maanna ilitsersuusiatsinnut ilanngullugit allattorpagut – saqqummiussukkat siammasikkunaartillugit ataatsimoortinniarlugit, ataatsimoorluta akisussaanitsinnut unammiuinissatsinnullu nukittorsaatissanngorlugit.
Tasiilami tikilluaqqusilluarnissinnut qujanarsuaq!
’QAQISA! – atuarfiit – inuussutissarsiortut – suleqatigiinnissaat pillugu ilitsersuusiaq’ martsip ingerlanerani saqqummissaaq kingornalu nunatsinni atuarfinnut tamanut nassiussuunneqassalluni, aammali CSR Greenlandip nittartagaa aqqutigalugu pissarsiarineqarsinnaalissaaq. Saqqummiussassaq annertujaartorsuuvoq, kalaallisut qallunaatullu 100-ut sinnerlugit qupperneqarluni. Imarivaalu sakkussat , atuarfiit, suliffeqarfiit immikkut suleqagiillutilluunniit atorsinnaasaat, atuartut ilinniaqqinnissaminnut pitsaasumik toqqaasinnaalernissaannut aqqutissiuutissat. Aamma ilaavoq ”Misiliilluni sulinermut ABC…” , angajoqqaajusunit, atuarfinni siulersuisunit atuarfinnilu siunnersuisartunit il.il ingerlatsinissamut isumassarsiorfissiaasoq… Pineqartorlu BikubenFondenip (aningaasaateqarfik) tapersersuineratigut piviusungortinneqarpoq.
