Nunarsuup anguniagassai meeqqat piginnaatitaaffii aallaavigalugit

Aggustimi CSR-ip konferencertitsinerani Meeqqat illersuisuat, Aviâja Egede Lynge, MIO-miit aggersarneqarpoq oqalugiaqquneqarlunilu ”Kalaallit Nunaanni Nunarsuup anguniagassat sooq qaqugulu atorneqarsinnaaneri” pillugu.

Ataani Meeqqat illersuisuata isiginnittariaasia malillugu anguniakkat qanoq isiginiarneqarnersut atuaqqissinnaavutit.

1. ”Meeqqat pisinnaatitaffii nunarsuarmi anguniagassanut sutigut imminnut naapertuuffeqarpat?”

Naapertuulluinnarput – Isumaqatigiissummut Kalaallit Nunaata 1993-imili maleruarumallugu atsiugaanut naapertuulluinnarput. Nunarsuarmi anguniagassat – naligiinngissutsip annikillisarnissaanut, peqqinnerulernissamut toqqissisimanissamullu, pitsaasumik ilinniagaqarnissap qularnaarnissaanut aamma kaannerup piitsuussutsillu atorunnaarsinnissaannut tunngapput. Nunarsuarmilu anguniagassat immikkuualunnerusumik anguniagassartaat misissorutsigit anguniagssaq 3.5 assersuutigisinnaavarput. Tassani pineqarput aanngajaarniutinik imigassamillu pinaveersaartitsineq atornerluinermillu katsorsaaneq, taakkununngalu illersugaanissaq Naalagaaffiit Peqatigiit Meeqqat pisinnaatitaaffii pillugit isumaqatigiissutaat naapertorlugu meeqqat pisinnaatitaaffigaat. Immikkuualunnerusutigullu anguniagassat aallaavigalugit uuttugassani immikkut taagorneqartuni 50-it toqqaannartumik meeqqanut tunngasuupput.

2. ”Nunarsuarmi anguniagassani suut Meeqqat pillugit Isumaqatigiissummeeriinngillat?”

Meeqqat pisinnaatitaaffii eqqarsaatigalugit isiginniaraanni nunarsuarmi anguniakkat meeqqat atugarisaannik nutaamik isiginnilersitsipput. Meeqqat pisinnaatitaaffii pillugit isumaqatigiissut anguniakkallu ataatsimoorussaqarput. Tamanna uanga nakooqutitut isigivara, neriullungalu ataatsimoorussat taakkua maanna siunissamilu meeqqat atugarisaasa patajaallisarnissaannik pisariaqartitsinerup qitiutittuarnissaannut imminnut sunneqatigiilluarumaartut.

3. ”Nunarsuarmi anguniagassat immikkoortut assigiinngitsut akimorlugit suleqatigiinnerunissamut oqaloqatigiinnerunissamullu aallaaviusinnaappat?”

Maannamut Kalaallit Nunaata inunnik isumaginninnerup iluani susassaqarfiit akimorlugit pisariaqartumik suleqatigiinnissaq meeqqallu atugarisaannik pitsanngorsaanissaq ajornakusoortissimavaa. Tamannarpiaq pissutigalugu siorna naalakkersuisuusunut oqariartuutigivara susassaqarfiit akimorlugit suleqatigiinnissaq inatsisitigut piumasaqaataasariaqaraluartoq. Taamaammat nunarsuarmi anguniakkanut tunngatillugu sakkortunerpaamik kaammattuutigiumavara, susassaqarfiit akimorlugit suleqatigiittoqarnissaa piumasaqaataassasoq, tassaannaanatik siunertanut pitsaasunut aallaaviiit – iliuuseqarfiunngitsut.

Angalasarninni meeqqat taakku ilaqutaallu naapillugillu naalaartarpakka. Ulluinnarisaat, kulturii, inooriaasii inuuinnarniarlutillu periusii aallaavigalugit takullugillu tusaaniarnikuuakka.

Uummatikkut attortissutiginerpaasara tassaavoq, takusinnaagakku meeqqat iliuuseqartoqarnissaanut suli nutaamik angalanermit nalunaarusiortoqarnissaanik utaqqisinnaanngitsut. Meeqqat 2030-p tungaanut utaqqisinnaanngilluinnarput.

Oqalugiaat uani atuarneqarsinnaavoq.