Nuummi World Cleanup Day
Ulloq 21. september 2019 World Cleanup Day ingerlanneqarpoq. Nuummi ulloq saliiffiusussaq silap ajornera pissutigalugu sapaammi 22. septemberimut nuunneqarpoq.
Piumassutsiminnik peqataasut 26-t Nuutoqqami Qaanniviit eqqaannut takkupput sumiiffimmi sissani marluusuni akunnermi ataatsimi saliiartorlutik.
Immap killinganit nunap naasullip tungaanut eqqakkat ersittut tamarmik katersorneqarput. Eqqakkanut puussiarsuit arlallit oqimaalutarneqarput. Inaarutaasumik angusat tassaapput eqqakkat 55,3 kilomik oqimaassusillit.
Pisiffimmit nerisassaqarluni sivikitsunnguamik unillatsiareernermi peqataasut eqqakkat assigiinngitsut immikkoortiterpaat, taakkulu aamma oqimaalutarneqarlutik. Eqqakkat assigiinngitsut nalunaarsorneqarneranni anguniarneqartoq tassaavoq eqqakkat suminngaanneernersut paasineqarnissaa (illoqarfimmeerpat imaluunniit allaneerpat) aammalu eqqakkat qanoq ittuunersut.
Eqqakkat makku katersorneqarput:
17 kg: Plastikkit (eqqiluisaarnermit eqqakkat, puussiat plastikkit, nerisassat mamakujuillu puukui, puujaasat plastikkit, quligutit/qaqorsaatit puukui aammalu plastikimik sanaat suussusii naluneqartut)
14 kg: Styropor/skumplast/flamingo aammalu qisuit sanarfisat
8 kg: Aluminiumimik puut/qillertuusat, savimerngit, saviminermik simiit, matut assigisaallu
4 kg: Igalaamineq marriallu
4 kg: Allunaasat
3 kg: Annoraamerngit (atisat, annoraamerngit, skuut atungaat)
2,5 kg: Papiaqqat pappiaqqallu qeratasuut
0,5 kg: Allunaasat qaartiterinermi atorneqartartut
0,5 kg: Aallaaniarnermi patronit patronilluunniit atortui
0,5 kg: Sikaritsit kimmivikui assigisaalluunniit
Qassutit ataatsit
Eqqagassamerngit immikkoortiterneqanngitsut katersorneqaqqipput ataatsimullu oqimaalutarneqarlutik
CSR Greenlandip saliineq misiliutitut ingerlappaa. CSR Greenland atuakkamik najoqqutassiussaaq, tassaasussaasoq saleeqatigiinnermik qanoq ingerlatsisoqarnissaanut ilitsersuut kiisalu paasissutissanik katersueriaatsimut ilitsersuut. CSR Greenland aappaagu ulloq 19. september 2020-mi ingerlanneqartussami World Cleanup Dayimi peqataanissani pilersaarutigaa aammalu nunatsinni najugaqarfiit allat peqataanissamut kaammattorlugit. Najoqqutassiaq nutaaq 2020-mi peqataasussanit nutaanit atorneqarsinnaassaaq.
WCD2019-ip ingerlanneqarnerani nunarsuaq tamakkerlugu inuit 20 millionit missaat nunanit naalagaaffiullu ilaannit 179-imeersut peqataapput. Nunat arlallit qanoq amerlatigisunik peqataatitaqarsimanerlutik eqqakkanillu qanoq annertutigisunik katersisimanerlutik pillugu nalunaarutinik tunniussuipput. Kalaallit Nunaata 2020-mi peqataasut amerlanerusut eqqakkallu amerlanerusut pillugit nalunaarusiornissaa neriuutigineqarpoq.
Pinngortitaq sinnerlugu – qujanarujussuaq!
CSR Greenlandip Plastic Not So Fantastic suleqatigineranut qujaffigerusuppaa. Nammineq piumassutsiminnik ikiuuttunut taakkulu meeraannut qujanarujussuaq sissat saligaannerulersikkassigit. Saliinermi tunniussimasoqarneranut nukissaqartoqarneranullu qujanaq. WCD-p ingerlanneqarsinnaaneranut periarfissiillutik tapeeqataasunut qujanaq.
Tapeeqataapput:
Pisiffik: sandwichit, naatitat, imeq, kaagit assannullu sprit saligu
Stark: eqqakkanut puussiarsuit aaqqatillu ataasiaannarlugit atortakkat
Kommuneqarfik Sermersooq: Eqqakkat ikuallaaviliaannerat
Carlsberg Group: peqataasut pooqattassaat
Aamma qujaffigaarput WWF, pisumi peqataaneranut filmiliorneranullu.
