QAQISA-p siunertaa politikkikkut aqutsisunut oqariartuutigineqarpoq
QAQISA nunatsinni kommunini tallimaasuni siammarterlugu CSR Greenlandimit ingerlanneqaleruttorpoq.
Allattoqarfik Kommune Kujallermi, Kommuneqarfik Sermersuumi aammalu Qeqqata Kommuniani malitseqartitsinermik ingerlataqarsimavoq. QAQISA kommuninit pingasuusunit tigulluarneqarpoq. Kommunit ilaat aggustimi ukiup atuarfiusup aallartinnerani ilinniartitaaneq qitiutillugu sapaatip akunneranik sammisaqarfiusumik ingerlatsisimapput, suliffeqarfinnut pulaarsimapput, suliffeqarfinnit pulaartoqarsimapput aammalu sulinermik misiliisoqartitsisimallutik. Allat septembarimi assingusunik aaqqissuussaqarsimapput, ilaatigullu suliffiit pillugit saqqummersitsisimallugit. Tamatuma saniatigut allat ukiup atuarfiusup 2019/2020-p ingerlanerani QAQISA-p naleqqussarneqarnissaa pilersaarutigaat.
Ukiup naannginnerani aallartisarnissamut oqalliffiusumik workshopertitsinissaq pillugu CSR Greenlandip Kommune Qeqertalik Avannaatalu Kommunia attaveqarfigai.
CSR Greenlandip IMAK-ip siulittaasua,Birthe Therkildsen ataatsimeeqatigaa, tamatumani QAQISA-p siammarternissaa oqaluuserineqarluni. IMAK-ip siulersuisui QAQISA pillugu ilisimatinneqassasut ataatsimiinnermi aamma isumaqatigiissutigineqarpoq.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Ane Lone Bagger, CSR Greenlandimik ataatsimeeqateqarnermini QAQISA pillugu ilisimatitsissummik tunineqarpoq, tassungalu ilanngullugu filmiliaaqqat pingasut takullugit, taakku atuartumit, atuarfimmi pisortamit suliffeqarfimmilu aqutsisumit ataatsimit peqataaffigineqartumik suliarineqarput, tassani QAQISA-mi peqataasimanerminni qanoq pissarsiaqarsimanerlutik oqaluttuarlutik. Tamatuma saniatigut QAQISA-p ineriartortinneqarnissaanut periarfissat oqaluuserineqarput.
Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaannut sassarnissamut CSR Greenland periarfissinneqarsimavoq. Ataatsimiititaliaq QAQISA-mik suliniummik saqqummiussivigineqassaaq, suliniummi peqataasut pillugit filmiliaaqqat takutinneqassallutik kiisalu QAQISA-p ineriartortinneqarnissaanut periarfissanik saqqummiivigineqassalluni.
