Suliffeqarfimmi tarnikkut peqqissuunermik siuarsaaneq
Suliniummik Suliffiit Peqqissut ingerlatsisut ulloq 25.-26. septemberimi Sisimiuni inuummarissaasunut pikkorissartitsinerit pingajuat kingullersaallu ingerlappaat, tamatumani qulequtarineqarluni tarnikkut peqqissuunissamut ABC.
Inuummarissaasut tarnikkut peqqissuunissamik siuarsaaniarluni sulinissamut ilisimasaqarnerulernissartik sakkussaqarnissartillugu ujartorpaat.
Tarnikkut peqqissuunissamut ABC ineriartortinneqarpoq tarnikkut peqqissuunissamut ilisimatuumit Vibeke Koushedemit innuttaasut peqqissuunissaannut naalagaaffiup institutianeersumit, taanna Charlotte Meilstrup Post.doc. aammalu tarnikkut peqqissuunissamut ABC-mik suliniummik aqutsisoq peqatigalugit inuummarissaasut pikkorissarneranni ilitsersuisuulluni.
Pineqartoq tassaavoq eqeersimaartumik iliuuseqarnissaq, peqatigiilluni iliuuseqarnissaq isumalinnillu iliuuseqarnissaq. Tunngavissat taakku pingasut ingiaqatigiissapput, taamaalilluni inuit ataasiakkaat aamma suliffimmi tarnikkut peqqissuunermik misigisaqarsinnaaqqullugit. ABC-mik periuseq malillugu suliffeqarfimmi ataatsimuussuseq pingaartinneqarnerulissaaq, tassa sunik tamanik sapigaqanngitsoqanngimmat, kikkulli tamarmik iliuuseqarsinnaammata ataatsimoorlutalu angusaqarnerujussuusinnaagatta.
Inuummarissaasut katsorsaasuunngimmata/terapeutiunngimmata erseqqissaatigissallugu pingaaruteqarpoq. Suliffeqarfimmi tarnikkut peqqissuunissap aallunneratigut aammalu tarnikkut peqqissuunermut siuarsaataasumik sammisaqarnikkut uippakajaarneq (stress), napparsimalluni sulinngittarnerit, isumatsanneq, annilaanganeq assigisaallu annikillisarneqarsinnaapput.
SIF-imit kisitsisit tupaallatsitsipput
Pikkorissartitsinermi siulliunneqarpoq suliffeqarfiiit peqataasut akornanni peqqissutsimik misissuinerup inernerat. Innuttaasut peqqissuunissaannut naalagaaffiup institutiata (SIF) misissuineq malinngaaffigalugu ingerlappaa.
Akissutit 580-it takutippaat amerlasuut kiserliortutut misigisimasut, imminornissamik eqqarsaateqartut allallu suliffimminni qinngasaarneqarnermik misigisaqartartut.
Naak akissutit innuttaasunik misissuinermut nalinginnaasumut sanilliullugu kisitsisitaat annikinnerulaaraluartut kisitsisit inuummarissaasunit tupaallaatigineqarput. Qanilleriasaartutut misigaat, tassami namminneq sulisorisatik pineqarmata. Suliffimmi tarnikkut peqqissuunissamik siuarsaanermik suliassaq inuummarissaasutut atuuffeqartunut isumaqarnerulersitsivoq. Kisimiillutilli ingerlassinnaanngilaat.
Aqutsisut siuttuussapput
Naalagaaffiup innuttaasut peqqissuunissaannut institutia Kalaallit Nunaanni suliniutip ingerlanneqarnerani inuummarissaasut telefonikkut apersornerisigut, sumiiffinni apersornerisigut suliffeqarfinnilu apeqqutinut immersuiffissiat aqqutigalugit paasissutissanik katersivoq. Misissuinerit takutippaat inuummarissaasut aqutsisuminnit tapersersorneqartut angusaqarnerpaasartut. Inuummarissaasut suliffeqarfimmi suliffiup nalaani inuummarissaasutut atuunnissaminnut piffissaqartinneqartarput nukissaqartinneqartarlutillu. Tamanna isumaqarpoq inuummarissaasumik ilinniartitsinermut aningaasaliineq sulisut piumassuseqalerlutillu tunniusimalernerisigut suliffeqarfimmut naliusunik utertitsiffiusarpoq.
GIF 2020-mit suliassamik tigusissaaq
Suliniummi suleqatigiit (Peqqissutsimut Naalakkersuisoqarfik, CSR Greenland aamma Kalaallit Nunaanni Timersoqatigiit Kattuffiat) suliniut Suliffiit peqqissut naggasissavaat suliniut pillugu annikinnerusumik nalunaarusiornermikkut. Kalaallit Nunaanni Timersoqatigiit Kattuffiata/GIF 2020-mit inuummarissaasunik ilinniartitsinissamik neqerooruteqassaaq.
Suliniut iluatsilluartutut nalilerneqarpoq, tassa suleqatigiinnerup takutimmagu ataatsimut anguniagaq suleqatigiinnikkut ingerlalluarneqarnerusartoq.
