QAQISA Upernavimmi, Kangillinnguit Atuarfiani Unicef-imilu
Atuartunut diplomit
QAQISA-mit diplomit Kangillinnguit Atuarfiani ulloq 5. novemberimi aaqqissuussinermi 10.A aamma 10.B-mi atuartunut agguaanneqarput, tamatumani atuartut, angajoqqaavi ilinniartititsisuilu peqataallutik. Atuartut, QAQISA-mit nersornaammik tassungalu ilanngullugu misiliilluni sulinerup naammassineranut uppernarsaammik tunineqarput.
Atuartut sulinermik misiliinertik pillugu saqqummiussinissamut aamma periarfissinneqarput. Anouk Szomlaiski Olsenip Royal Greenlandip kantiinaani sulinermik misiliinini pillugu atuaqatiminut isersimasunullu kusanartumik saqqummiussivoq.
Upernavik QAQISA-mut piareerpoq
CSR Greenland ulloq 20. novemberimi Atuarfik Prinsesse Margrethemi aallartisarnissamut suleqatigiissitsinermik ingerlataqarpoq, soorluttaaq ulloq taanna atuartut angajoqqaavilu QAQISA pillugu paasissutissiivigineqartut.
CSR Greenland Upernavimmiinneq iluatsillugu suliffeqarfinnut arlalinnut pulaarpoq. Suliffeqarfiit assigiinngitsut arfinillit iserneqarput, tamarmillu QAQISA tapersersorlugu oqaatigaat aammalu illoqarfimmi atuartut sulinermik misiliinissamut tikilluaqquaat. Atuartut tulliit sulinermik misiliisussat 10. klassimeersuupput, taakkulu 2020-mi maajimi misiliissallutik.
Tipsernermit Lottornermillu QAQISA-mut aningaasaliissutit
Tipsernermit Lottornermillu aningaasaliisartut QAQISA-mut 100.000 kr.-inik tapiissuteqarput. Aningaasat suliniummi atorfissaqartinneqarluarput. Tapiissuteqartoqarneratigut allatseqarfik 2019-imi kvartalit sisamaanni 2020-milu kvartalit siullianni angalanissamut periarfissaqalerpoq.
UNICEF
UNICEF-ip ulloq 28. november ataatsimeersuarnerani QAQISA ataatsimeersuarnermi peqataasunut CSR Greenlandimit ilisaritinneqarpoq. Ataatsimeersuarnermi inuit 200-t missaat peqataapput aammalu Naalakkersuisunut Inatsisartunullu ilaasortat kiisalu kommuninit tallimaasunit borgmesterit pingasut peqataallutik. Tamatuma saniatigut NGO-t arlalippassuit, suliffeqarfiit, ilisimatusartut allallu meeqqanut inuusuttuaqqanullu, atuarfeqarnermut ilinniartitaanermullu tunngasunik suliaqartut.
