Inuussutissarsiutinik ingerlataqartut QAQISA pisariaqartippaat
– aammalu inuussutissarsiutinik ingerlataqartut sulisussanik pisariaqartitsipput
Suliffeqarfiit maanna unammilligassaat tassaanerusarpoq piginnaaneqarluartunik sulisussanik amigaateqarneq. Siunissamut ungasinnerusumut pilersaarusiornikkut ullumikkut eqeersimaartumik iliuuseqartoqareersinnaavoq. Siunissami sulisorineqartussaq tassaasinnaavoq atuartoq suli atuarfimmik ingerlatsisoq. Atuartoq meeqqat atuarfiannik naammassereernermi kingorna ilinniagassamik toqqaanissamut isumassarsiorfissanik amigaateqarajuppoq.
Atuartoq imaassinnaavoq suliffeqarfiit ulluinnarni sanioqquttaraa aammalu silataannaanit takusarlugu. Atuartup qanigisani malinniarnerusarpai aammalu najukkami suliffeqarfinni suliffiit assigiinngitsut paasisaqarfiginissaat amigaatisarlugu. Suliffeqarfimmi suliat assigiinngitsorpassuusinnaanerat, taamaalillunilu ilinniarnissamut periarfissat assigiinngitsorpassuunerat paasisaqarfigissallugu annertuumik periarfissiissaaq.
Najukkani suliffeqarfiit QAQISA-mut ilanngussinnaapput, taamaalillutillu atuartut suliffeqarfimmut pulaartitsinissamut periarfissiillutik aammalu namminneq atuartut klassiannut pulaarsinnaassallutik. Taama pulaarnerit atuartup siunissami aqqut ingerlaarfissaata, ilinniarnermillu toqqaanissaata aqqutissiornissaanut peqqutaaqataasarput.
Taamaalilluni najukkami suliffeqarfiit QAQISA-mut peqataaleqqullugit aammalu peqataalernermikkut siunissami sulisut ilinniarsimasuunissaasa peqataaffigeqqullugu CSR Greenlandimit kaammattorneqarput.
QAQISA 2019-imi Qaqortumi, Nuummi, Maniitsumi, Sisimiunit Upernavimmilu najukkani aqutsisoqatigiinnik pilersitsinikkut aallartinneqarpoq, tamatumani atuarfimmi aqutsisut, najukkami atuarfik inuussutissarsiutinillu ingerlataqartut peqataallutik.
2020-mi QAQISA Kommune Kujallermi illoqarfinni allani, Paamiuni aammalu Nuummi atuarfinni allani, Kommune Qeqertalimmi Avannaatalu Kommuniani aallartinneqassaaq. 2021-mi QAQISA-p Tasiilami aallartinneqarnissaa pilersaarutaavoq.
CSR Greenland aallartisarnissamut isumasioqatigiinnermik najukkani ingerlatsisassaaq aammalu aallartitsereernermi malitseqartitsinissamut isumasioqatigiinnermik neqerooruteqartassalluni. CSR Greenlandip QAQISA-p ineriartornera najukkani aqutsisoqatigiinnik oqaloqateqartarnikkut malinnaaffigissavaa.
QAQISA pillugu annertunerusumik paasisaqarfigerusukkukku attavigiuk CSR Greenland una aqqutigalugu csr@csr.gl imaluunniit +299 36 37 18.
