Saligaatsoq 2020-mut atatillugu CSR Greenland suleqatissarsiorpoq
– Illoqarfinni nunaqarfinnilu tamani
Saligaatsoq 2019 Kalaallit Nunaanni tamani inuussutissarsiutinik ingerlataqartunit tapersersorneqarluarpoq. Illoqarfiit 17-it nunaqarfiillu 8-10-t peqataapput. Saligaatsoq nuna tamakkerlugu ulloq saliiffiusussatut CSR Greenlandimit anguniarneqarpoq.
Anguniagaq tamanna aatsaat iluatsissinnaavoq najukkami najugaqartut peqataalluarnerisigut suleqataanerisigullu. Saligaatsoq pillugu najukkami pilersaarusioqatigiinni najukkami suliffeqarfiit namminnerlu piumassusertik malillugu peqataasut peqatigalugit kommunit peqataaqqullugit kaammattorneqarput.
Illoqarfiit nunaqarfiillu ilaanni ukiumoortumik ullormik saliiffimmik ingerlataqarneq ileqqooreersimasinnaavoq. Taamaattorli Saligaatsup ulloq ingerlanneqarfissaa najukkami aamma nammineq aalajangerneqarsinnaavoq. Tamanna aput aariarpat imaluunniit ulloq Inuiattut Ullorsiorfik sioqqullugu ingerlanneqarsinnaalluni.
Saligaatsoq ingerlanniarlugu makku pisariaqarput:
- Najukkami aqutsisussat
- Najukkami pilersaarusioqatigiinni peqataasussat
- Najukkani makkununnga aningaasaliisussat:
- Aaqqatit
- Eqqakkanut puussiarsuit
- Ullormi Saligaatsup ingerlanneqarfiani imermik, naatitanik tamulugassanillu pilersuisussat
- Eqqakkanut puussiarsuarnik katersorneqartunik katersuineq eqqaaveqarfimmullu angallassineq
- Najukkani allagarsiinerit
- Najukkani pinnatassiinerit
- Ullormi saliiffiusumi najukkami assiliisussat
Pilersaarusioqatigiit suliassaat allat:
- Najukkami aningaasaliisinnaasunut qinnuteqarnerit
- Peqataanissamut aggersaanerit ilannguttussanillu nalunaartitsinerit
- Aningaasaliisussat tunniussatik sumut qaqugulu tunniussisinnaanerannik ataqatigiissaarineq
- Peqataasut atortussanik aallerfissaat
- Peqataasut sumiiffinni assigiinngitsuni sumi saliinissaannut nunap assiliorneq
- Igitanik katersukkanik aallertussat ataqatigiissaarneqarnerat
- Najukkami assiliartalinnik qujassutitut allagarsiinissaq/tusagassiorfitsigut nalunaaruteqarnissaa
- Pisup ingerlanera pillugu angusallu pillugit CSR Greenlandimut nalunaarusiornissaq
CSR Greenland Saligaatsup pilersaarusiornerani ataqatigiissaarisuussaaq, siunnersuisuussaaq ikiuutissallunilu.
Saligaatsoq pillugu pilersaarusiornermut ilitsersuut malitassallu uani takukkit www.csr.gl
