CSR Greenland ukiut qulinngortorsiorlugit nalliuttorsiorpoq
”Kalaallit inuiaqatigiittut ikittunnguugatta ataatsimoorluta kivitsissaagut. Suliffeqarfiit piginnaasanik periarfissanillu tapersiissapput, pigisaminnik, atuilluartuusumik aqqut ataaseq sammiveqarluta ineriartortitseqatigiissaagut. Ullumikkut tamanna pillugu peqatigiiffimmik nutaamik aallartitsivugut, tassaasoq CSR Greenland.”
Taamatut oqaluttarfimmiit nipeqarpoq, GrønlandsBANK-inimi CSR Greenland ukiut quleqqissaat matuma siorna pilersinneqarmat.
Pilersinneqannginnerani pilersitsisut tassaasut Sulisitsisisut, GrønlandsBANKEN, Air Greenland, Royal Arctic Line aamma KompetenceKompagniet akornanni ataatsimiinnerpassuit ingerlassimavaat, iluserineqartussaq eqqorluinnartoq suliffeqarfiit akisussaaffiannik suleqatigiissutigineqartussarlu (CSR) nassaariniarlugu aamma peqatigiiffiup qanoq iluseqarnissaa nassaariniarlugu siunnerfiliornermi naapittarsimapput.
Nassaarineqartoq tassaavoq suliffeqarfiit annertuumik imminnut attavigeqatigiittut, CSR-ip nukittorsarnissaanik siuarsarnissaannillu tunngaveqartumik suliaqartut, suliffeqarfiit akornanni suleqatigiinneq kiisalu Namminersorlutik Oqartussanik, kommuninik inuaqatigiinnilu innuttaasunik siunersioqatigiittarnerit ingerlanneqassallutik.
Maanna, ukiut qulit qaangiunneranni, peqatigiiffik 51-inik ilaasortaqalersimavoq, kommuninillu, naalakkersuisoqarfinnillu aamma peqatigiiffiit soqutigisaqaqatigiit suleqatigiinnissamik isumaqatigiissuteqarfigineqarsimapput. Suleqatigiinneq inuussutissarsiorlutik ingerlatsisut inuiaqatigiillu akornanni ersarissoq takuneqarsinnaavoq.
Sooq inuiaqatigiit akornanni akisussaaqataaneq qaqinneqarpa?
CSR Greenland ukiut qulit matuma siorna pilersinneqarmat CSR-mik suliniuteqarneq nutaajuvoq illuatungaanili aamma Kalaallit Nunaanni nutaajunani. Ukiuni amerlasuuni Kalaallit suliffeqarfii minnerunngitsumik inunnik ikiuinernik suliniuteqartarsimapput, inuit atugaannik pitsanngorsaaniarlutik aammalu sulisut sumiiffigisamilu inuiaqatigiit ikiorniarlugit. Taamaasilluni inuiaqatigiit akornanni akisussaaqataanissamik eqqarsaatit nutaajunngillat. Illuatungaanili ataqatigiissumik aaqqissuussineq aamma pilersaarusiukkamik ingerlatsineq nutaajuvoq, tassanilu avatangiisinut tunngasut ilanngunneqarput aamma ileqqorissaarnissamut tunngasut. (assersuutigalugu ileqqorlunnerit akiorniarlugit) – minnerunngitsumik suliffeqarfiit CSR niueqatigiinnermut atatillugu atortarpaat.
Niuernermullu tunngatinneranut peqquterpiaasoq, Brian Buus Pedersen-ip pingaartilluinnagaa unaavoq:
“Qularutiginngilluinnarpara, CSR-imik silatusaartumik suliniuteqarneq suliffeqarfinnik ingerlatsinermi iluaqutaassasoq, niuertorpalaartumik eqqarsarneq ilanngutissagaanni”, taamatut oqarpoq nangillunilu: “una pineqanngilaq, suliffeqarfik inunnik isumaginninnermik suliaqassasoq, kisianni suliffeqarfiit ajortunik sunniuttaat suliarissallugit aamma pitsaasumik sunniuteqarnissaq – suliffeqarfimmik ingerlatsineq tunngavigalugu.”
CSR Greenland peqatigiiffittut suliffeqarfiit suleqatigiissinniarnerini qitiuvoq, ataatsimut suliassatut pilersaarutit inerisarneqarsinnaatillugit aamma suliffeqarfiit ataasiakkaat CSR-imik suliniutaat ataatsimiinnertigut nukittorsarlugit, attaveqaatinik ataatsimiinnerni aamma pikkorissarnerni. Peqatigitillugu suliffeqarfiit akornanni suleqatigiinnissamik periarfissat pilersinneqarput aamma naalakkersuisoqarfiit kommunillu – peqatigiiffik aqqutigalugu.
CSR Greenland ukiuni qulini peqatigalugu
CSR Greenland-ip ukiuni qulini atuunnermini aqqusaagassat assigiinngitsut pingasut nalaassimavai:
Ukiut siulliit 2010-imiit 2013-imut CSR-ip suliassaqarfiinik suliffeqarfinnut soqutigisaqaqatigiinnullu ilisimatitsilernissamik annertuumik suliaqarfiusimapput. Taamaasilluni ilisimasanik pilersitsinissaq pingaartinneqarsimavoq aammalu attaveqaatigisat peqatigalugit isumassarsiorluni ataatsimiinnerit, pikkorisarnerit, seminaarit peqatigitillugulu, Naalakkersuisunik oqaloqateqartarnerit ’Inuiaqatiigiit akornanni Akissussaaqataaneq pillugu oqallittarfik” aqqutigalugu’. Tassani suliffeqarfissuit angisuut CSR-imi iliuuserisassatik siulliit aamma nalunaarusiornerit pilersippaat, aamma suliffeqarfiit GrønlandsBANK-initut, Air Greenland-itut, Royal Arctic Line-itut aamma TELEPOST-itut ittut, nunat assigiinngitsut akornanni FN Global Compact-ip suliffeqarfinnik akisussaassuseqartumik ingerlatsinissamik tunngavigisai atsioqatigiissutigaat.
CSR-ip aqqusaagaata aappaani ersarissumik ’atatsimoorluni pingaartitaq’ (CSV), ukkatarineqarpoq, Harvard-imi proffessor-ip Michael Porter-imit isumassarsiarineqarsimasoq. Tassani eqqarsaatigineqartoq tassaavoq, suliffeqarfiit niuernikkut aningaasarsiorfiusunik suliassaqarfigisassaat pilersinneqassasut aamma inuiaqatigiinnut, tamatumanilu suliffeqarfiit pingaarnertut piginnaasaqarfii tunngavigineqassasut.
Tamatuma saniatigut CSR Greenland allat suleqatigalugit suliassatut pilersaarutinik pilersaarusiorput soorlu assersuutigalugu avatangiisit pillugit suliniunitinik WWF peqatigalugu aamma inituumik suliffissaqartitsineq pillugu suliaqartut peqatigalugit.
Aqqusaakkat pingajuanni 2016-imiit CSR Greenland-ip FN-ip Nunarsuarmi Piujuannartitsisumik Ineriartornissamik anguniagai annertusiartuinnartumik ukkatarilersimavai (Nunarsuarmi anguniakkat), aamma suliffeqarfiit ilaasortaasa Nunarsuarmi anguniakkanik ilisimasaqalernissaat sulissutigisimavai. Peqatigitillugu suliassatut pilersaarutit arlallit ingerlanneqarput, Nunarsuarmi anguniakkanut aalajangersimasunut tunngassuteqartut. Tassunga assersuutissatut ilaavoq suliniutaasoq QAQISA, Nunarsuarmi anguniakkani 4-itut ilaasoq: pitsaassusilimmik ilinniartitaaneq aamma peqqinnissamut tunngatillugu ambassadør-itut ilinniartitsineq, Nunarsuarmi anguniakkat 3-attut ilaasoq: peqqinneq. Nunarsuarmi anguniakkatut ukkassinerup aamma malitsigaa, suliffeqarfiit ilaasortaasut piujuaannartitsisumik iliuusissatut pilersaarutinik nutaanik pilersitsisimammata, annermik aningaasanik suliffeqarfimmut inuiaqatigiinnullu pilersitsinisssaq ukkataralugu.
Allatut oqaatigalugu, peqatigiiffik piffissap ingerlanerani inuiaqatigiinnut akisussaaqataaneq suliffeqarfinnut aningaasarsiorfiulluartuusoq ukkataralugu ineriartorsimavoq.
CSR Greenland-ip siunissaa
CSR Greenland ukiunut tulliuttunut qulinut, Nunarsuarmilu anguniakkanut annertuumik tunngassuteqartunut piareersimavoq. Nunarsuarmi anguniakkat piujuartitsisumik ineriartornissamut tunngasut FN-imeersut 17-iupput, taakkualu 2030-imi anguneqareersimassapput aamma CSR-imik suliaqarnermi Kalallit Nunaanni sinaakkutissatut piukkunnartuupput.
Christian Keldsen, Sulisitsisuni pisortaq nutaaq, taamaasillunilu CSR Greenland-imi siulittaasunngortoq nutaaq, CSR Greenland aallaqqaataaniilli qanimut malittarisimavaa, oqarporlu: “Nunarsuarmi anguniagaasut uagut aamma inuussutissarsiortutut anguniagarivagut. Tamanna tunuliaqutigalugu paasissavarput, qanoq suliffeqarfiit inuiaqatigiit sunniuteqarfigisarneraat aamma qanoq annertugisumik iluaqutaatiginerput”.
Siulittaasup nutaap aamma CSR-imik suliniuteqarnermi suliffeqarfinnut aningaasanik pilersitsinermi iluaqutigineqarnera pingaaruteqarneralu tikkuarpaa: “ Qulakkiissavarput, suliaq suliffeqarfinnut ataatsimoorussamik aningaasarsiornermik pilersitsissasoq aamma inuiaqatigiinnut, tamannalu suliffeqarfinnut pingaaruteqarpoq. Suliniutigineqartoq pisortap suliassaanut ilanngunneqassaaq – tassami tunngaviatigut inuiaqatigiinnut aamma avatangiisinut sunniuteqarneq pisortamut akisussaaffiuvoq.”
CSR-ip suliai pillugit annertunerusumik www.csr.gl-imi atuarsinnaavatit imaluunniit allaffeqarfimmi pisortaq Ulla Lynge csr@csr.gl-ikkut attavigisinnaavat.
