INI A/S: 9. februar nalliuttorsiorfiuvoq!
Meeqqat oqartussaasut plakatiliartik borgmesterimut, kommunaldirektørimut, najugaqarfiup siulersuisuinut lokalradiomullu saqqummiuppaat.
Ukiup affaa kingulleq meeqqat oqartussaasut najugaqarfitsik qanoq pitsanngorsarsinnaanerlugu sulisimapput. Aalajangersimappullu qimmit angalaannartut eqqarsaatigalugit isumannaassuseq ukkanniarlugu.
Meeqqat plakatiliorsimapput ima oqariartuutilimmik `Meeqqat paarisigit qimmillu pitullugit` peqatigiiffimmullu Qimusseq Sisimiunut allagaqarsimallutik kaammattuutigalugu qimmit pituttorneqarnissaat toqqissillutik aneersinnaajumallutik. Allagartik peqatigiiffiup siulittaasuanut ataatsimiinnermik siuliani tunniuppaat.
Qaaqqusanut saqqummeereeramik najugaqarfimminni plakati nivinngaassorpaat.
Neriuppugut Sisimiuni nivinngaassorneqartoq plakatiliarisimasaat tigulluarumaarissi.
