IPUKmi peqataasut pilluaritsi
Apriilip aallaqqaataaniit suliffeqarfiit aqqanillit maligassiuisutut suliniummi pissanganartumi CSR-mik piujuartitsinermillu sammivilimmik tunaartaqartunik sammisaqarput. CSR Greenland-ip peqataasut tamaasa sulilluarnerannik pilluaqquaat.
Suliffeqarfiit naapeqatigiissitsinerni sisamani aammalu isumasioqatigiissitsinerni arlalinni peqataareerlutik peqataanermikkut inuiaqatigiinni akisussaaqataaneq piujuartitsinerlu aallaavigalugu suliffeqarfik qanoq ineriartortinneqarsinnaasoq ilisimasaqarfiginerulersimallugu suliniut naammassivaat. Naammassinninneq novembarip 12-ani ilasseqatigiinnermik allagartartaarfiusumik malunnartinneqarpoq.
Suliffeqarfimmut peqataalersitsineq
Kalaallit Nunaanni suliffeqarfiit amerlaqisut Corporate Social Responsibility (CSR)-mik suliniuteqareerput. Ilaasa eqqakkat imaluunniit nerisassanik eqqaasarnerup annikillisinnissaat suliniuteqarfigaat, allalli peqqissuunissaq sammivaat sumiiffinni timersoqatigiinnut tapiissuteqartarneq aqqutigalugu, suliffeqarfiillu arlallit ilinniartitaaneq sulisullu ilorrisimaarnissaat sammisarisarlugit.
Tamannalu ajunngilluinnarpoq, taamaattorli amerlanertigut suliffeqarfiup CSR-imik suliniutai suliffeqarfiup ineriartornermini anguniagaannut ilaatinneqaratik. Suliffeqarfiup anguniagassamisut pilersaarutaannut CSR-mik suliniuteqarneq peqataatinneqarpat, taava CSR-imik suliniuteqarneq, inuiaqatigiinni suliniutip iluaqutigineqarnerata saniatugut suliffeqarfimmut naleqalersitsisinnaavoq.
Kalaallit Nunaanni suliffeqarfinnut iluaqutaasussaq
Suliniutip siunertaa tassaavoq piujuartitsinermik suliniuteqarnerup qanoq ililluni suliffeqarfiup peqataalersinneratigut suliffeqarfiup nalinganik annertusaasinnaaneq, peqataanikkullu Kalaallit Nunaanni suliffeqarfinnut ilisimalikkat pillugit tunniussaqarneq. Peqataasut suliniummi sakkussat assigiinngitsut atorlugit namminneq suliffeqarfimminni aallaavitsik aallarniutigalugu piujuartitsinermik aallaavilinnik suliniuteqarnissaminnut ukkatarisassatik aalajangersarpaat, kiisalu uuttuinerit aammalu anguniakkat pillugit nalunaarusiornerit sungiusarpaat.
Misilittakkat aammalu sakkut ilitsersuummut nutaamut katersorneqarput, ilitsersuullu Kalaallit Nunaanni suliffeqarfiit piujuartitsineq pillugu suliniuteqarnissaminnut atorluarsinnaavaat. Ilitsersuut qallunaatut kalaallisullu suliarineqartup IPUK naggaserlugu online-kut 14. december ataatsimeersuartitsinermi ingerlanneqartumi saqqummersinneqassaaq.
Peqataasut aqqanillit pilluaritsi
Suliniut IPUKmi peqataasut ukuupput: Nuuk Imeq, NCD Siorarsiorfik, Polar Seafood, Greenland Ruby, Tusass, Betoncentralen, KNI, Inuplan, Hotel Hans Egede, Nukissiorfiit aammalu Qalut Vónin. Suliniut Industriens Fond-imik aningaasaliiffigineqarpoq kiisalu CSR Greenland-ip Anne Mette Christiansen aamma Henrik Schramm Rasmussen suliniummut siunnersortitut atorpai.
