Piujuartitsineq pillugu ataatsimeersuarnermut peqataagit
Suliniut ”IPUK – piujuartitsineq aallaavigalugu ineriartorneq” – ataatsimeersuartitsinermik 14. december nal. 9-12. onlinekut ingerlanneqartumik naggaserneqassaaq. Ataatsimeersuarnermi suliniummi misilittakkat ilisimalikkallu Kalaallit Nunaanni inuussutissarsiortunut isumassarsiorfittut iluaqutaasinnaasut saqqummiunneqassapput.
Suliniut IPUK aallarnerlugu martsimi Katuami ingerlanneqartumi ataatsimeersuartitsisoqarpoq, maannalu online-kut ataatsimeersuartitsinermik naggaserneqarluni. Suliniummi aqutsisut peqataasullu arlallit qaammatini kingullerni qulingiluani unammillernarisimasatik aammalu misilittagarilersimasatik pillugit saqqummiissapput. Programmi uani takuneqarsinnaavoq www.csr.gl.
Tamatumap saniatigut ilitsersuut nutaaq saqqummiunneqassaaq. Ilitsersuut suliffeqarfinnut CSR-mik tunaartaqarlutik suliniuteqarusuttunut naleqqussagaalluni suliaavoq.
Suliniummi IPUKmi suleqataasut tassaapput Sulisitsisut, Greenland Holding kiisalu GrønlandsBANKENi. Suliniutip naammassineranut atatillugu ”IPUK Naalagaaffiit Peqatigiit Nunarsuarmi Anguniagaannut ilisimasaqarfik” pilersippaat, taannalu CSR Greenlandimik aqunneqassaaq. Ilisimasaqarfiup pilersinneqarneranut siunertaasoq tassaavoq nunatsinni suliffeqarfiit piujuartitsinermik suliniutiminnut piginnaasaqarnerulernissaminnut ilisimasanik katersivissaat aammalu ilisimasaminnik paarlaateqatigiiffissaat.
