Arctic Cleanup
CSR Greenland attaveqaqatigiinni Nordic Coastal Cleanup-imi uku peqatigalugit Hold Danmark Rent (Danmark), Ringrás (Savalimmiut), Keep the Archipelago Tidy Association (Finland), Hold Norge Rent (Norge), Håll Sverige Rent (Sverige), Arctic Marine Conservation Crew (Island) aamma Städa Åland (Åland) peqataavoq. Attaveqaqatigiit suliniutaat tassaavoq nunani avannarlerni sinerissap qanittuani saligaatsuutitsinissaq eqqakkallu katersorneqartut pillugit paasissutissanik katersineq. Paasissutissat ataavartumik pissarsiarineqartut misissoqqissaarnerisigut paasiniarneqartarluni eqqakkat suminngaanneernersut aammalu eqqakkat imarmut pinaveersaartinniarlugit qanoq suliniuteqartoqassasoq anguniarneqarluni.
Attaveqaqatigiit aamma Ocean Concervancy-imi peqataapput, taassaasoq nunarsuaq tamakkerlugu sinerissap qanittuani saligaatsuutitsinissamik International Coastal Cleanup-imik suliniaqatigiiffik. Suliniaqatigiiffiup siunertaraa nunarsuaq tamakkerlugu saligaatsuutitsinermi suliniutiniit paasissutissat apuussorneqartut katersussallugit. Attaveqaqatigiit Nordic Coastal Cleanup kiisalu suliniaqatigiiffiup Ocean Conservancy-p akornanni suleqatigiinneq aallaavigalugu suliniut Arctic Cleanup pilersinneqarpoq.
Arctic Cleanup tunuliaqutaralugu peqataasussat Nuummiissapput ulluni 27.-29. juni 2022, tassanilu CSR Greenland, Plastic Not So Fantastic, WWF Grønland aammalu ESANI A/S-imeersut ataatsimeeqatigineqassallutik.
Pilersaarutinut ilaavoq Plastic Not So Fantastic Kalaallit Nunaanni suliniummut ingerlanneqartussamut ataqatigiissaarisuussasoq, aammalu ukiut tamaasa taamatut suliniuteqartoqartassasoq kiisalu paasissutissanik katersuineq aamma isumagineqassasoq. Issittumi nunat arlallit suliniummi aamma peqataapput.
