Nuuk Saligaatsoq 2023-imi eqqakkat 10,42 tons katersorneqarsimapput
Nunat tamalaat akornanni immamut ullorititaasumi Juunip 8-ni 2023 Nuummi Saligaatsoq ingerlanneqarpoq. Saliisut 628-it missaanniittut 10,42 tons eqqakkat katersorsimavaat.
Nuummi Saligaatsumut peqataasut amerlassusaat amerlanerpaajugaangata 600-it sinnertarpai. Naliginnaasumik saliisitsinermi ukiut tamaasa 4-5 tons eqqakkat katersorneqartarput, marloriataalli katersorneqarsimapput. Taamaattumik saliisitsineq iluatilluartutut nalilerneqarsinnaavoq.
Saliisutsialaat
Ukioq manna Nuummi Saliisutsialattut ukiukinnerpaat marlunniit ukiullit Meeqqerivik Soraluminngaanneersut toqqarneqarsimapput – meeqqerivik Soralu pilluaqquarput!
Saliisutsialaaqqat GrønlandsBanken-imiit drikkedunkinik, qungasequtinik meeqqanullu amimut nipitittakkanik akissarsitinneqarput.
Saliisutsialannik toqqaaneq ilaatigut tunngavilersuutigineqarpoq meeqqat mikineranniit avatangiisivut saligaatsuutinnissaa pillugu qaammarsaaneq aallartittariaqarpoq. Oqaatigineqarsinnaavoq saliisutsialattut toqqarneqartut iliuuseqarnerminnik aallartereersut. Inersimasunut aamma oqariartuutaavoq ukioq kaajallallugu saligaatsuutitsinissamut.
Nuummi 7. klassit saliinerat
Maajip ulluisa 23-anni 2023-mi Nuummi atuarfinni arfiniliusuni 7.klassit sullisitik ativaat, Saligaatsoq 2023 ingerlanneqarnissaanut ”kissassiillutik” ikiutaallutik Nuummi eqqakkanik katersuimmata.
Ulloq Kangillinnguit Atuarfianni naammassineqarpoq, atuartut tassani ullormi katersukkatik ataatsimut uuttortarpaat – eqqakkat katersukkat inerneraat: 750 kiilut missaat akunnerit marluk iluanni katersorneqarput. Atuaqatigiillu saleeqataasut tamarmik akissarsitinneqarput, akissarsissutigisaallu ataatsimuualaarnermut imaluunniit atuartitsinermi atugassanngorlugit akissarsissutigaat.
Ullormi saliinermi Brugsenimit Qalut Vóninimiillu tapiiffigineqarpoq, saliisitsinerlu Nuummi Najukkami Ataatsimiititaliamit, CSR Greenland Kommuneqarfik Sermersuullu Avatangiiseqarnermut immikkoortaanik suleqateqarlutik aaqqissuuppaat.
Kivitseqataasut
CSR Greenland suli Nuummi ataqatigiissaarisutut inissisimavoq. Suleqataasut tassaapput;
- Stark: puussiarsuarnik aaqqateralaanillu tunniussivoq
- Godthåb Transportservice: eqqakkanik akeqanngitsumik assartueqataapput
- Pisiffik: peqataasunut imeruersaatinik naatitanillu tunniussaqarput
- Royal Greenland: peqataasut assanut sprittissaanik aamma assartuisut tamulugassaannik imeruersaatissaannillu tunniussaqarpoq
- GrønlandsBanken: Saliisutsialaat akissarsiassaannik tunniussivoq
- Eqqakkanik Tigooraavik, Kommuneqarfik Sermersooq: eqqakkanik assartueqataapput tigooraallutillu
- Mediehuset Sermitsiaq.AG: avatangiisit piujuartitsinerlu pillugit sammisamik saqqummersitsineq aamma ussassaaruteqarneq aningaasaliiffigaa
Sinerissami
Sumiiffinni ataasiakkaani Saligaatsoq ingerlanneqareerpoq. Avannaani apeqqinnera pissutaalluni sumiiffinni arlalinni saliisitsinissaq kinguartinneqarnikuuvoq. Sumiiffigisami saliisitsinissamut aaqqissuisoqanngippat pilersaarusiortoqanngippalluunniit, saliisitsinissap pilersaarusiornera aallartisarniarlugu CSR Greenland attavigineqarsinnaavoq, email: csr@csr.gl
Saligaatsoq Facebook-imi uani malinnaavigisinnaavat aammalu #saligaatsoq atoruk assinik ilioraagaangavit
Assit:
Nuummi Meeqqerivik Soralu Saliisutsialattut toqqarneqarpoq.
Nunalerinermut, imminut pilersornermut, nukissiutinut avatangiisinullu naalakkersuisoqarfimmit sissami sassumap arnaata eqqaani saliipput, neriullutik sassumap arnaa isumagissaarnerulissasoq, aasaanerani pissarsilluarnissarput kiisalu aasarsiorluarnissarput neriuutigalugu.
(Asseq: Grønlands Selvstyre)
