ESG PILLUGU ISLAND-IMI MASTERCLASS
Savalimmiuni peqatigiiffik Burdardygd peqatigalugu CSR Greenland ilaasortani december 2023-imi Reykjavik-imut soqutiginarluinnartumik ESG pillugu nunani avannarlerniittunut naleqqussakkamik imaqatumik Masterclass-imut peqataaqqullugit qaaqquai, aaqqissuussamut NORA aningaasaleeqataasuuvoq. Siullermeertumik peqataasut Savalimmiuniit Kalaallit Nunaanniit Islandimiillu ataatsimoorlutik qaninnerusumillu attaveqaqatigiinneq kiisalu akorniminni isumassarsioqatigiillutik assigiimmik programeqarlutik naapeqatigiipput.
Reykjavikimi ullut sisamat islandimiit savalimmiuniillu suliffeqarfiit sinniisaannik attaveqaqatigiinnermik periarfissagissaarfiuvoq, minnerunngitsumillu ESG piujuartitsineq, kiisalu silap pissusaa, CSRD, uumassusillit assigiinngisitaarnerat avatangiisillu pillugit suliffeqarfinnik islandimeersunik ineriartornermi siuttuusunik; Icelandair, BRIM, FESTA – Center for Sustainability, Landsbankinn aammalu Marel-miit saqqummiinerit soqutiginarluinnartut saqqummiunneqarput.
Kalaallit Nunaanniit Nalik Ventures aammalu Air Greenland, kiisalu Savalimmiuniit Bakkafrost, Betri Bank, Føroya Tele, JK Petersen kiisalu MEST peqataapput.
Angalaqatigiinneq iluatsilluarpoq naak suliffeqarfiit peqataasut Kalaallit Nunaanneersut amerlanngikkaluartut, angalaqatigiinnerup kingunerisaani 2024-imi qaammatini arlaqartuni internetikkut attaveqaatit atorlugit webinar-erikkut assigiinngitsunik saqqummiisunik nunanit pingasuneersunik peqataaffigineqarsinnaasunik periarfissiivoq. Neqeroorut CSR Greenlandimi ilaasortanut tamanut ammavoq.
ASSEQ: Inga Dóra Guðmundsdottir Markussen, Air Greenland-miit aamma Inoqut Kristensen, Nalik Ventures-miit Anne Mette Christiansen CSR Greenland sinnerlugu peqataasoq Island-imi decemberimi Masterclass-imi peqataapput.
