ESG PIUJUARTITSINERLU PILLUGIT 2023-IMI PIKKORISSARNEQ
Nuummi ulluni sisamani teori sammineqareersoq Københavnimilu ulluni pingasuni oqalliffiusumik, isumassarsiorfiusumik suliffeqarfinnullu pulaarluni paasisassarsiorfiusumik CSR Greenland ukiup aallartinnerani ESG piujuartitsinermillu sammisaqarluni pikkorissarneq ilaasortanik amerlasuunik peqataaffigineqartoq ingerlappaa.
Piujuartitsinermik suliaqarnermi sammisat, silap pissusaanut pisunut ilisarititsineq, uumassusillit assigiinngisitaarnerat, inuttut pisinnaatitaaffiit, peqquserlulluni iluanaarniarnerup akiorniarnera, piujuartitsinermi tunaartat, suleriaatsinut sakkut inatsisillu – aammattaarlu misilittakkat assigiinngitsorpassuit pikkorissaassutigineqarput. Paasisassarsiorluni angalaqatigiinnermi suliffeqarfiit pulaarneqartut arlallit akornanni uku Rambøll, Nykredit kiisalu Folketinget assersuutigigalugit pulaarneqarput.
Ukiut kingulliit iluanni inuit 130-niit amerlanerusut pikkorissaanermi peqataasarsimapput, taakkualu ullumikkut ataatsimoorlutik piujuartitsinermik suliaqarnermi ilisimaqartuullutillu soqutiginnittuupput attaveqaqatigiinnilu naapitassaallutik.
2023-imi suliffeqarfiit uku GrønlandsBANKEN, Qalut Vónin, Nukissiorfiit, Kommuneqarfiik Sermersooq, WWF, Nalik Ventures, Rambøll, Royal Greenland, Brugseni aammalu Qeqertalik Business Council pikkorissarnermi peqataatitaqarmata nuannaarutigaarput.
