IPUK: atuilluartuusumik niuertarfeqalernissap tungaanut ingerlaneq
Industriens Fond, Sulisitsisut aamma CSR Greenland suliniummik annertuumik nutaamik ”IPUK – piujuartitsineq aallaavigalugu ineriartorneq”-mik qulequtserlugu saqqummiipput. Suliniummi piujuartitsineq aallaavigalugu niuernikkut aningaasarsiornikkullu kiisalu FN-ip piujuartitsilluni ineriartortitsinermi nunarsuarmi anguniagai ilanngullugit Kalaallit Nunaanni ineriartortitsinissaq siunertaavoq. Illit suliffeqarfiit quliusut akornanni iluatsitsisut akornanniissaviit, peqataasoq?
Piujuartitsinneq tunngavigalugu suleriaaseq suliffeqarfiup iliuuserisassanut ammalu suleriaasiatut eqqunneqassaaq – ineriartornermik, sulifissaqartitsinermik aamma inuiaqatigiinni pitsaasumik ineriartortitsinermik tamanna kinguneqassammat. Sulisitsisuni CSR Greenland-imilu taamatut siunniussaqarluni suliniuteqarneq ukiut 10-t matuma siorna aallartippoq. Suliffeqarfinnut piujuartitsineq aallaavigalugu aammalu FN-ip piujuartitsilluni ineriartortitsinermi nunarsuarmi anguniagai aallaavigalugit ineriartoqqinnissamut suli annertuumik periarfissaqarpoq – aamma kalaallit suliffeqarfiutaasa annertunerujartuinnartumik tapersersorneqarnissartik piujuartitsinermillu alloriarnissaminnut tullermut tunngatillugu isumassarsisinneqarnissartik pillugu ujartuipput.
Suliniummi suliffeqarfiit 10-t FN-ip piujuartitsilluni ineriartortitsinermi nunarsuami anguniagaanut 17-isunut suliffeqarfittut iliuusissaminnik kiisalu taakkununnga piviusunngortitsinissamut suliniutissaminnik aqqusaagaqassapput. Suliffeqarfiit tamatuma kingorna suliffeqarfinnut allanut suliniutip imarisaanut tunngatillugu maligassiuisunngussapput, aammalu niuernerpalaartumik piujuartitsisumillu iliuuseqarnikkut kiisalu unammilligassat pingaarutillit qaangernissaannut, kalaallit inuiaqatigiit aammalu nunuarsuarmioqatigiinni suliassaasunut annertuunut peqataassallutik.
– piujuartitsineq aammalu FN-ip piujuartitsilluni ineriartortitsinermi nunarsuami anguniagaanut iliuuseqarnissaq pingaaruteqarluinnarpoq aammalu suliffeqarfinni ingerlatseriaatsimut ilaatilluinnarnissaa pisariaqarluni. Suliffeqarfiup iluani akisussaaffiup appasittumik inissinnginnissaa qullersalli suliassaattut inissisimanissaa naleqquppoq. Taamaaliornikkut, niuernermi aammalu unammillersinnaasuseqarneq nutaaq periarfissatut nutaatut ammassapput. Pineqartoq taanna, Sulisitsisuni ukiut 10-t qaangerlugit suliarisimavarput aamma suliniut taanna kalaallit suliffeqarfiutaannut annertuumik siumut pitsaasumut ajunngitsumik ingerlanissamut assorsuaq periarfissaavoq, taamatut oqarpoq pisortaaneq Christian Keldsen, Sulisitsisut.
Suliniut CSR Greenland-imit aqunneqarpoq novembarillu tungaanut suliniutinik assigiinngitsunik imaqartinneqassalluni, tassani nunani avannarlerni FN Global Compact-imi suleqatigiit ukiumut ataasiarluni pisartumi Nuummi ataatsimiissaasa tunngaanut.
-Kalaallit suliffeqarfiinut inuiaqatigiinni akisussaaqataaneq suliffeqarfimmik ingarlatsinermi pissusissamisoortutut isigineqarpoq. FN-ip piujuartitsilluni ineriartortitsinermi nunarsuarmi anguniagai najoqqutaralugit ataatsimoorluta piujuartitsinermik aallaaveqarluta nutaamik ’suleqatigiissutissatsinnik” peqalersimavugut taamaasillutalu suliassaqarfiit akimorlugit nunamilu maani assigiimmik ingerlavissamik aallaaveqarluta suleqatigiissinnaanngorpugut. Suliniut annertuumik isumalluarfigaarput, suliniummut aqutsisuusoq Ulla Lynge, CSR Greenland, oqarpoq.
Suliniutit ”IPUK” – piujuartitsineq aallaavigalugu ineriartorneq” ulloq 15/3 CSR Greenland-ip ataatsimeersuarneranut atatillugu saqqummiunneqassaaq kiisalu apriilimi ammasumik ataatsimeersuartitsinermi aallartinneqassalluni.
Annertunerusumik tusagaqarnissannut alapernaappisi? Taava Ulla Lynge ugguuna oqarasuaat +299 36 37 16 imaluunniit mailikkut ulla.lynge@csr.gl tusarniaavigiuk.
