Kalaallit Nunaat Saligaatsoq 2022
Saligaatsoq nunatsinni sumiiffiit ilaanni pilersaarusiorneqarlunilu ingerlanneqareerpoq. Saliisitsinerit qanoq ingerlanneqarsimasut pilersaarutigineqarnerilu ataani kommunikkaartumik paasissutissartai atuakkit.
Kommune Kujalleq
Nanortalimmi Brugseni Nanortalik saliisitsivoq maajip 21-ani. Inuit 40-t missaanni peqataasimapput, saliinerlu ingerlalluarsimasutut nalilerneqarluni.
Qaqortumi Brugseni Qaqortoq aamma Kommune Kujalleq suleqatigiillutik saliisitsineq maajip 21-ani ingerlappaat. Silagissuup ataani peqataasut 100-t sinnilaarlugit saliisimapput. Puussiarsuit 150-t missaanniittut katersorneqarsimapput saliisitsinerlu ingerlalluarsimasutut nalilerneqarluni.
Narsarmi Kommune Kujalleq juunip 15-ani kommunimi sulisunut qulit nunaqarfimmiunullu peqatigalugit saliisitsivoq.
Kommuneqarfik Sermersooq
Paamiuni Najukkami Ataatsimiititaliap saliisitsineq marloriarlugu ingerlappaat, innuttaasunit meeqqanik ilaqartunit peqataaffigineqartumit. Saliisitsinerni ingerlanneqartuni puussiarsuit katillugit 1.400-it missaanniittut immerneqarput. Aningaasaliisut tassaapput Paamiuni Najukkami Ataatsimiititaliaq, Royal Greenland, Brugseni, Pilersuisoq aamma namminersortoq Mikeeraq. Saliisitsinerit ingerlalluarsimasutut nalilerneqarput.
Nuummi CSR Greenland ataqatigiissaarisoralugu saliisitsineq juunip 14-ani ingerlanneqarpoq. Suliffeqarfiit peqataaniarlutik nalunaarsimasut 31-viupput saliisullu 400-t sinnerlugit peqataallutik. Saniatigut nammineq kajumissutsiminnik saliisimasut peqataanissaminnut nalunaanngitsoorsimasut katersaat aaneqarput. Eqqakkat katersorneqartut katillugit 4.270 kg oqimaatsigipput.
Saliisutsialattut toqqarneqarpoq Mittarfeqarfinni Driftskoordinatori Vivi R. Olesen. Tunngavilersuutigineqarporlu annertuumik saliilluaqqissaarsimanera. Vivip akissarsiarai Pisiffimmiit gavekorti 1.000 kr.-imik nalilik, eqqakkanik katersissut guld-imik qalipanneqarnikoq plakatillu Saga Mapsimiit tunniussat.
Aningaasaliisut tapersiisullu tassaapput Stark Kalaallit Nunaat, Pisiffik, Godthåb TransportService, GrønlandsBanken, Mediehuset Sermitsiaq.AG, Arctic Import, Brugseni Qinngorput, MD Byg Grønland minnerunngitsumillu Kommuneqarfik Sermermuumi Materialegårdeni aamma Eqqakkanik Tigooraavik.
Tasiilami aasap ingerlanerani saliisitsinissaq pilersaarutaavoq.
Ittoqqortoormiini pilersaarutaavoq saliisitsineq aggustimi ingerlanneqassasoq, aputeqarpallaarnera pissutigalugu.
Qeqqata Kommunia
Maniitsumi Arctic Circle Business aamma Qeqqata Kommunia suleqatigiillutik saliisitsineq juunip 15-ani ingerlappaat. Atuarfimmiit, suliffeqarfinniit peqatigiiffinniillu saliisut 150-t missaanniittut peqataapput. Kommunip gummigedia 36-riarluni immerneqarpoq, annertussuserlu taanna 14,5 m3-uvoq. Saliinerlu kusanarluinnartumik inerneqarsimasutut nalilerneqarpoq. Maniitsumi Sulisitsisut saliisunut grillerititsinissamut aningaasaliivoq.
Sisimiuni juunip 20-ani suliffeqarfiit saliineq nammineq ingerlappaat. Stark saliinissamut atortussanik tapersiivoq. Brugseni Sisimiut imeruersaatinik tapersiivoq. Kommuni eqqakkanik assartuineq tigooraanerlu isumagivaa.
Kommune Qeqertalik
Kangaatsiami juunip 19-ani Kommune Qeqertalik saliisitsivoq. Saliisitsinerup kingorna eqqugassaqartitsisoqarpoq, tamulugassanik sassaalliisoqarpoq sammisaqartitsisoqarlunilu.
Aasianni Saliisitsineq ingerlanneqarpoq juunip 9-ani, ataqatigiissaarisuuvorlu Qeqertalik Business Council. Saliisitsinermut peqataasut 45-t missaanniipput. Saliinermi puussiarsuit 71-t sinnerlugit immerneqarput. Kommune Qeqertalik suleqataalluarsimavoq eqqakkanillu aallerneq ammatissimallugu juunip 17-ata tungaanut.
Qasigiannguani juunip 14-ani Kommune Qeqertalik saliisitsivoq. Royal Arctic Line, Mittarfeqarfiit aamma Entreprenør Kommune Qeqertalik eqqakkanik assartuivoq. Saliisunut meeqqanullu tamulugassanik sassaalliisoqarpoq aamma nipilersortunik aliikkusersuisoqarpoq. Apple iPad 10.2 eqqugassatut peqataasimasunut makitsisoqarpoq.
Qeqertarsuarmi saliisitsinissaq Kommune Qeqertaliup pilersaarusiorniarlugu nalunaarutigaa.
Avannaata Kommunia
Ilulissani Najukkami Ataatsimiititaliap juunip 18-ani saliisitsineq ingerlappaa. Saliisitsinissamut peqataasussat apuunnissaat eqqarsaatigalugu illoqarfimmi bussit ingerlaartinneqarput. Peqataasut makitsinermut atorneqartussanik billetsinik tuniorarneqarput. Saleereernerup kingorna Hinnarik kammanilu aamma nipilersortartut ”Assholes” aliikkusersuipput. Brugseni tamulugassanik sassaalliivoq. Saliinerup saniatigut qimmiitillit saliinissaannut kaammattorneqarput.
Uummannami saliisitsinissap ingerlanneqarnissaa naatsorsuutigineqarpoq aggustimi pissasoq.
Upernavimmi Avannaata Kommunia saliisitsineq juunip 19-ani saliisitsineq ingerlappaa. Saliisut 120-t missaanni peqataapput. Suliffeqarfiit arlallit peqataapput ilaatigut Avannaata Kommunia, Qullilerisoq, Tamalaat aamma Nukissiorfiit.
Aningaasaliisut tassaapput Tamalaat, Qullilerisoq, Tusass, Nukissiorfiit aamma Najukkami Ataatsimiititaliaq. Eqqakkat katersorneqartut annertussusaat missingersorneqarpoq lastbiilit angisuut lastiat minnerpaamik sisamariarlugu immerlugu. Gummigedit, kramerit biilillu minnerit lastii atorlugit assartuisoqarpoq.
Qaanaami saliisitsineq Avannaata Kommunianiit juunip 20-ani ingerlanneqarpoq.
Nunaqarfiit
Nunaqarfinni saliisitsineq KNI Pilersuisoq A/S-imit ataqatigiissarneqarpoq, kingusinnerusukkullu inerneri saqqummiunneqarumaarlutik.
Immersueqataagit
CSR Greenlandip suliniut Saligaatsoq 2011-imili ukiut tamaasa ingerlattarpaa.
Ukiuni kingullerni illoqarfiit tamaasa nunaqarfiillu arlallit aamma saliisitsinermut peqataasarput.
Saligaatsumut peqataasartut suleqatigineqartartullu siammasimmata, Saligaatsoq ineriartorteqqinnissaanut isumaat paaserusupparput. Taamaattumik immersugassaq uani akiguk:
