CSR Greenlandip suleqatigiinnissamik isumaqatigiissuteqarneq iluatsippaa
Ukiuni pingasuni ingerlasussatut pilersaarut ”Suliffiit peqqissut” suliffeqarfinni peqqissutsimik siuarsaanissamik siunertaqartoq.
CSR Greenlandimi siulittaasup tullia, Martin Kviesgaard, Kalaallit Nunaanni Timersoqatigiit Kattuffianni siulittaasoq Nuuka Kleemann aammalu Peqqinnissamut Naalakkersuisoq Agathe Fontain ”Suliffeqarfiit Peqqissut”-mik taallugu suleqatigiiissutissamik ukiuni 3-ni ingerlasussamik atsioqatigiipput.
”CSR Greenlandimi anguniagarivarput inuiaqatiginni peqqissutsimik qaffaanissaq. Taamatullu siunnerfeqarneq Nunatsinni Timersoqatigiit Peqatigiiffiat Peqqinnissaqarfillu akornitsinni ataatsimoorfigaarput. Taamaattumik nuannaarutigaarput, peqqinnissaq pitsaasumillu suliffeqarnissaq siuarsarumallugit pilersaarut ataatsimoorluta neqeroorutigisinnaaleratsigu, ingerlanniagaq sullivimmi aammali aamma angerlarsimaffinni, peqqinnerusumik inuunissamut kajungersaataaqataasinnaasoq” – Martin Kviesgaard, siulittaasup tullia oqarpoq.
Ingerlanniarneqartoq aallarnisarlugu Nuummi Sisimiunilu peqqinnissamut ambassadørissanik pikkorissaanerit pingasut ingerlanneqarput, taakkunani sundhedsambassadørissat peqqinnissamut tunngatillugu ilisimasanik nutaanik Dansk Firmaidrætimeersunit ilinniartinneqarlutik immersuutigivaat, taamallu sundhedsambassørissat Timersoqatigiit Katuffiannit, Peqqinnissaqarfimmit CSR Greenlandimillu peqqinnissaq pillugu suliffeqarfinnut sammisumik suliniarnerminni ikorfartorneqarlutillu sakkussalersorneqartut pilersinneqarput.
”Takusinnaavarput suliffeqarfiit 20-it ingerlanniakkami peqataasut, peqqinnissaq aallaavigalugu ineriartortitsinissamik assut angusaqarsinnaasussat. Peqqinnissamullu tunngasumik tamakku naliliinerit inernerini soorlu malugineqassapput sulisut suliartornissaminnut qilanaarnerusalersimasut aammalu napparsimakulasarnerit appasinnerusumiilersimasut. Aammalu peqqinnissamut ambassadøriulersut malugisinnaassavaat avatangiisiminnut isumassarsianik tunniussuinertik.” – Lotte Kirkegaard, CSR Greenlandimi allattoqarfimmi pisortaq oqarpoq.
