Ingerlanneqartumut nalunaarusiaq tunngavigalugu ingerlaqqinnissaq pilersaarutip tullianut ”Qaqisa!”-mut ingerlateqqipparput
Maannalu aamma misiligutaasumik ingerlanneqartup SA-AS naammassineqarnerani nalunaarusiaq suliaralugu naammassivarput.
”Nalunaarusiaq pitsaasumik misilittakkat angusallu pillugit uppernarsaasiissutaavoq. Peqataasimasullu tamaasa qutsavigiumavagut – minnerunngitsumillu qujassutigiumavagut ilisimalikkat, isumassarsiat il.il, nalilersuinermi pissarsiarisimasagut. Saniatigullu aamma pigilerparput tunngavissaq CSR Greenlandimi suliniaqqinnissatsinni atugassarput” – Lotte Frank Kirkegaard, allattoqarfimmi pisortaq
Aviaq Brandt pilersaarusiornermi aqutsisutut atorfinitsinneqarpoq ataatsimoorussilluni suliarineqarsimasut qaammatini tulliuttuni sisamani ilitsersuusianngorlugit saqqummiunnissaannut.
”Suliareqqissavakka QAQISA-mik ingerlatsinermi pissarsiarisimasat, tamatumunngalu atatillugu illoqarfinnut nunaqarfinnullu arlaqartunut angalasassaanga, tamakkunanit ilanngukkumasat ilitsersuusiassamut ilangussinnaajumallugit. Tikitanni ilaatigut oqaloqatigisassavakka atuarfinni pisortaasut, atuarfinni atuartunik siunnersuisartut, atuartut, angajoqqaat inuussutissarsiuteqartuneersullu, anguniarumallugu ilitsersuusiap pitsaasumik pineqartumut sammisuunissaa, iluaqutaasumik atorneqarsinnaalluni aammalu piviusumut sapinngisamik attuumassuteqarnissaa. Qilanaarivara inuusuttut inersimasullu suliarinninninni naapittarnissaat ”, Aviaq naggasiilluni oqarpoq.
Ilitsersuusiassaq ateqassaaq QAQISA!, 2018-illu aallartilaarnerani ilisaritissavarput. Ilitsersuusiaq atuisussatut anguniarneqartunut periarfissanik amerlanerusunik ammaassissaaq, isumassarsiorfissaassalluni, suleqateqarniarnermut sakkussaassalluni, qanoq iliorluni inuussuttut siunissaminnut takorluuisinnaasut imminerlu akisussaassuseqarnerusumik inissisimalerlutik aammalu iluaquserneqassalluni ilinniagassamik toqqaasinaanissaq. Ilitsersuusiarlu kommunini atuarfinnit tamanit inuussutissarsiortunillu atorneqarsinnaasunngorlugu akeqanngitsumik tunniussuunneqassaaq, taakkununnga akunnermi inuussuttut amerlanerusunut ilinniagaqalernisssamut aqqutissiuunniarnerinut atorneqarsinnaasunngorlugu.
Suliniut pillugu naggataarutaasumik nalunaarusiaq uani atuaruk.
