Suliffiit Peqqissut: Naalakkersuisoq Martha Abelsenimik ataatsimeeqateqarneq
CSR Greenland, Peqqissutsimut Ilisimatusarnermullu Naalakkersuisoqarfik, Kalaallit Nunaanni Timersoqatigiit Kattuffiat kiisalu Statens Institut for Folkesundhed, Kalaallit Nunaat suleqatigiillutik ”Suliffiit Peqqissut” ingerlallugillu ineriartortippaat.
Suliniummi ingerlatsisut Peqqissutsimut Ilisimatusarnermullu Naalakkersuisoq Martha Abelsen ataatsimeeqatigisimavaat ”Suliffiit Peqqissut” killiffissiorniarlugit kiisalu suliniutip Naalakkersuisut innuttaasut peqqinnerunissaanut suliniummut ”Inuuneritta II”-mut qanoq tapertaanersoq paasissutissiissutiginiarlugu.
Suliniut nunarsuarmi anguniakkanut suleqataasoq
Suliffeqarfinni suliniut aqqutigalugu Inuummarissaasut suleqatitik peqatigalugit suliffeqarfinni sunngiffimmilu aalanerulersimapput. Nalunnguarfiup Atuarfiani sulisut allornerit amerlassusaannik unammisimapput, eqimattamilu ajugaasut katillugit 1.864.761-riarlutik allorsimallutik. Suliffeqarfimmi ataatsimi tamanna suliniut ingerlanneqarsimavoq sulisullu 25-t missaat peqataasimallutik.
Kalaallit Nunaanni Timersoqatigiit Kattuffianni uppernarsineqarsimavoq meeqqat timersortartunik angajoqqaallit timersorneq ajortunik angajoqqaalinniit timersornerusartut. Naak suliniut suliffeqarfinni ingerlanneqaraluartoq Kalaallit Nunaanni innuttaasut peqqissusaannut pitsanngorsaaqataavoq. Qeqqata Kommuania assersuutissatsialaavoq innuttaasut peqqissusaannut pitsanngorsaaqataanermut suliniuteqarsimasutut, suliffeqarfimmi suliniummik ingerlatsisut meeraaqqerivinninngaanniit utoqqaat illuisa peqataapput. Tamannalu innuttaasunut tamanut peqqinnerulernissamut suliniutaavoq, taannalu nunarsuaq tamakkerlugu anguniagassani nr. 3-juvoq peqqinneq atugarissaarnerlu.
Suliniutip ingerlateqqinnissaa
Statens Institut for Folkesundhed, Kalaallit Nunaata inuummarissaasut qanimut malinnaavigisimavaat suliniullu ingerlaavartumik nalilersorsimallugu. Tamassumalu kingunerivaa misilittakkat aallaavigalugit inuummarissaasut ilinniartitseriaasissap inerisarneqarnera. Suliniut 2019-imi kvartalimi kingullermi naammassippat suliniut Kalaallit Nunaanni Timersoqatigiit Kattuffiannut ingerlateqqinneqassaaq.
