QAQISA imatut aallartisarsinnaavat
Suliffeqarfissinnut pulaarneqarsinnaanissaq neqeroorutigisiuk imaluunniit klassit pulaarsigit
Suliffeqarfiit QAQISA-mut pingaarnertut tunniussassaat tassaavoq suliffeqarfimmut pulaartitsinerit aamma klassinut pulaarnerit. Atuartoq sulisullu naapittarnerat suliniummi qitiulluinnarpoq. Naapinnermi atuartup eqqarsaatit makku pilersittarpai akissutisillugillu; sunngorusuppunga? Taanna anguniarukku atuarfimmi suut pikkoriffiginerulertariaqarpakka? Atuartut naapitatik assigiinngitsut maligassiuisutut isigilertarmatigit, pingaaruteqarpoq atuartut atorfiit assigiinngitsut ilisimalernissaat, sulerisarnersut, suullu piumasaqaataanersut siunissami sulisut malillugit angusaqarusukkunik.
Misiliilluni sulisarneq pitsanngorsarsiuk!
Misilittakkat takutippaat pitsaasuusoq praktikkip (misiliilluni sulinissap) ingerlanissaanik pilersaarusiuussilluarnissaq.
Atuartut kaammattorneqarput praktikkerfissarsiornermi sulissasut soorlu piviusumik suliffittaarniarlutik. Taamatullu ingerlasoqarsinnaassappat pisariaqarpoq misiliilluni suliffigisassat atuartumik iluamik imminut piffissalertarnissaat, soorlu taanna suliffissarsiortoq, taamaammallu taamaattutut piumasaqarfigaluguttaaq.
Inuusuttut eqqarsaatigilluagaasumik misiliillutik suliffissaminnik toqqaanertik nuannaarutiginerulersarpaat. Suliassatillu isumaliutissiissutaalluartumik aaqqissugaasumillu aaqqissugaangaangata misiliillutik sulinerminni naleqartinneqarnerusut misigisarput. Suliffeqarfiit piareersimanerulertarput inuusuttut misiliillutik sulinissaanni tigusilluarnerunissaminnut inuusuttunillu inerisaanissaminnut, taamatullu sulineq atuarfiit inuussutissarsiortullu akornanni attaveqarluarnerulernermik kinguneqartarput.
QAQISA- Atuarfiit-suliffeqarfiit suleqatigiinnissaannut ilitsersuummi Misiliilluni sulinissamut ABC… nassaarissavat, tassaanilu nassaarisinnaavatit najoqqutassiat assigiinngittut siunnersuusiat, allagartamik nersornaatiliornissamut atorsinnaasat, nalilersuinermi tunngaviusinnaasut, eqqaamasassat allattorneri aammalu oqaloqatigiinnissanut najoqqutaasinnaasut kiisalu aamma takusinnaavatit Paamiuni siullermeerutaasumik 2015-2017 ingerlatsinermi misiliilluni sulisitsinermut atatillugu ingerlatsisimanerit.
Suliniut tamaat aallartiguk
CSR Greenlandip aallarnisaalluni workshopertitsineq neqeroorutigaa. Workshopimi peqataasut QAQISA-p sulissutigineqarnissaa pilersaarusiorneqarneralu pillugit paasitinneqassapput. Pingaartumik ingerlatassat atuarfiup suliffeqarfiillu peqataasut ukioq naallugu pilersaarusiornermut naleqqussarneqarnissaat pilersaarusiornermi immikkut pingaaruteqarpoq. Tamatumani ukiumi atuarfiusumi assersuutigalugu 2019/2020-mi QAQISA-p ingerlanneqarnissaa pisariaqartinneqartumik inissaqartinneqarnissaa qulakkeerniarneqarluni.
Ingerlatassat ilaatigut tassaapput atuartut najukkami suliffeqarfinnut takuniaasarnissaat imaluunniit suliffeqarfiit atuarfimmut pulaartarnissaat. Atuartut suliffeqarfinni sulinermik misiliinissaat pilersaarusiorneqassaaq imaluunniit najukkani ilinniartitaaneq pillugu saqqummersitsisoqartassalluni. Tamatuma saniatigut angajoqqaat, atuarfinni siulersuisut il. il. peqataatinneqartassapput.
Kikkut peqataassappat?
Najukkami sammisassanik ingerlatsinermi kivitseqataasinnaasut suleqatissat suleqatigiilluarnissaat QAQISA-mut atatillugu assut pingaaruteqarpoq. QAQISA-p tamanut pitsaasumik nuannersumillu misigisaqarfiginissaani suleqatissat tamarmik pingaarutilimmik inissisimapput. QAQISA-p najukkami suleqatissai assersuutigalugu tassaapput kommunimi atuarfimmik ingerlatsivik, atuarfimmi pisortaq, atuarfimmi siunnersorti, angajullernut ilinniartitsisoq, angajoqqaat, najukkami suliffeqarfiit minnerunngitsumillu atuartut angajulliit.
QAQISA – Atuarfiit-suliffeqarfiit suleqatigiinnissaannut ilitsersuut uani aajuk.
Najukkani aqutsisoqatigiinnit CSR Greenland attavigineqarsinnaassaaq aammalu ingerlaavartumik oqaloqatigineqartassallutik, soorluttaaq qanoq ingerlasoqarnera pillugu killiffik paasiniarneqartassasoq.
