Saligaatsoq Qaqortoq
Ukioq manna Qaqortoq siullerpaamik Saligaatsumut peqataapput, taamaakkaluartoq kultureqareerput saligaatsuutitsinissamut – tamannalu tulluusimaarnaqaaq misigalugu. Maajip 17-ani Qaqortoq siullerpaajulluni Saligaatsoq ingerlappaa. Inuit 100-it sinnerlugit tussiarfissuarmi saliijartorsimapput. Saleereernerullu kingorna grillerisoqarsimavoq eqqugassanillu makitsisoqarluni. Kalaallit Nunaanni Brugseni Qaqortoq, Kommune Kujalleq Saligaatsoq aaqqissuussimavaat. Pisiffik suleqataalluni eqqaavinnik containerinik aamma piareersaasimavoq.
CSR Greenland Qaqortumi
Maajimi CSR Greenland Qaqortumut angalanermini maluginiarpaat Qaqortoq assut saligaatsoq. Illoqarfiup qeqqani kommunimi sulisut aqqutigisassat kussiniillu salikkaat takussaapput. Pujoralannginnissaa anguniarlugu sioqqat, ujaraaqqat ivikkallu katagarnikut katersorneqarsimapput aasariaannanngorlugit. Pisuttuarnermilu malugineqarsinnaavoq innuttaasut maangaannaq eqqaaneq atugarinngikkaat, eqqaaviillu atorluarneqartut.
Suliffeqarfiit takornarissat tikinnginneranni eqqartik saligaatsuutinnissaat sulissutigisarpaat. Tikeraarnermi malunnarpoq innuttaasut, suliffeqarfiit kommunilu ataatsimoorlutik akisussaassusermik pigisaqartut illoqarfitsik saligaatsuutinnissaannut.
CSR Greenland Qaqortoq qujaffigerusuppaa, qilanaaralugu suleqatigiinnerup ineriartorteqqinnissaa.
