Nunarsuaq tamakkerlugu anguniakkat – anguniagaqarfik pitsaasoq
Piujuartitsinissamik tunngaveqarluni ineriartortitsineq aammalu suliffeqarfiit taakkununnga atatillugu ingerlatassaat pillugit FN-ip nunarsuaq tamakkerlugu anguniagai 17-it qitiutillugit sammillugit CSR Greenland ulloq 7. august ulloq tamaat pikkorissartitsivoq, tamatumani sammineqarluni nunarsuaq tamakkerlugu anguniakkat 17-iusut ilaasa suliffeqarfiit aaqqissuussaanermik suliaqarneranni qanoq ilanngunneqarsinnaanersut.
Pikkorissarnermi peqataasut assut soqutiginnillutillu pimoorussipput. Tamatuma saniatigut nunarsuaq tamakkerlugu anguniakkat 17-iusut nunatsinni qanoq qaqugulu nuna tamakkerlugu ilusilersorneqarlutillu atuutsinneqalernissaat Naalakkersuisunit kissaatigineqarnersoq assut soqutigineqarpoq. Aningaasaqarnermut Naalakkersuisoqarfimmit Julie Lund Jeppesen saqqummiussinermigut nunarsuaq tamakkerlugu anguniakkat 17-iusut naalakkersuinikkut Naalakkersuisunit pilersaarusiorneqarnerat sumut killinnersoq pikkorissartunut alapernaatsunut oqaluttuaraa.
