Saligaatsoq: Illoqarfiit 17-it nunaqarfiillu arfineq pingasut avatangiisii saligaannerulersut
Illoqarfiit Saligaatsumi toqqaannartumik peqataanermikkut tamanna ingerlappaat imaluunniit najukkani ataatsimiititaliat innuttaasut ullormi ataatsimi saliinissamik aaqqissuussillutik ingerlatsipput.
Nunaqarfinni aqutsisut, suliffeqarfinnit aallartitat kiisalu namminneq piumassutsiminnit peqataasut nunaqarfinni ullormi ataatsimi saliinissap ingerlanneqarnissaa qulakkeerpaat.
CSR Greenland nuna tamakkerlugu assorsuaq qujassuteqarusuppoq. Saligaatsup pilersinneqarneranilli ullormi saliisitsinermi illoqarfiit tamarmiullutik aatsaavissuaq peqataapput.
Suliniutinik aqutsisut, pilersaarusiortut; namminneq piumassutsiminnik ikiuuttut suliffeqarfinniillu aallartitat, kommunit tapiissutaat peqataasullu tamaasa immikkut qujaffigineqarput.
Tusagassiorfiit Saligaatsoq pillugu immikkut aallutaqarnerat tamatta allanngueqataasinnaanitsinnik oqariartuummik siaruarsaaqataavoq. Tusagassiorfik Sermitsiaq.AG-p CSR Greenland suleqatigalugu avatangiisit silallu pissusia pillugit aviisinut ilanngutassiamik saqqummersitsivoq, ”Avatangiisit tatineqartut: allanngueqataasinnaavutit”. KNR Radiop Saligaatsoq qanimut malinnaaffigaa aammalu Saligaatsup ingerlanneqarnerani tamarmi apersuinikkut tusarnaartartunut nutaanik tusagassiisarluni.
Saligaatsoq ataatsimullu isigalugu najukkamilu saliinissaq namminneq piumassutsiminnik peqataasunit assut soqutigineqartoq allattoqarfimmit maluginiarneqarpoq. Ukioq manna Meeqqanut Saligaatsoq avatangiisit eqqagassallu pillugit suliamik ilisimasallit arlallit peqatigalugit Pinngortitamut Avatangiisinullu Naalakkersuisoqarfimmit ingerlanneqartoq siullerpaamik suleqatigiissutigaarput.
Suliassaq ataaseq nuna isorartooq akimorlugu inunnit arlalippassuarnit ingerlanneqarsinnaasoq suliniutip takutippaa.
Kalaallit Nunaat Nunarsuaq tamakkerlugu anguniakkanut tapeeqataarusuppoq
Saligaatsoq nunarsuaq tamakkerlugu anguniakkanut ikinnerpaamik arfinilinnut tapeeqataavoq (nr. 11 Illoqarfiit inuiaqatigiillu atajuarsinnaasut, nr. 12 Akisussaasumik atuineq tunisassiornerlu, nr. 13 Silap pissusaanut suliaq,nr. 14 Immami uumassuseq, nr. 15 Nunami uumassusillit kiisalu nr. 17 Nunarsuarmi tamarmi peqatigiinnerit) aammalu Nunarsuaq tamakkerlugu anguniakkat angunissaannut suliniutip qanoq tapeeqataasinnaaneranut assersuutaalluarluni. Annertunerusumik iliuuseqarnissamik kissaateqarneq ukioq manna Saligaatsumi peqataasut ersarissumik oqariartuutigaat.
Sumiiffiit ilaat eqqaavissuaqarfillit qanorluunniit ilioraluaraanni eqqagassat pinngortitamut teqqaannartarnerat pissutigalugu peqataanissaq apeqqusersimavaat. Aamma eqqaavissuaqarfiit iliuuseqarfigineqarnissaat kissaatigaat. Tamatumunnga taarsiullugu eqqaavissuaqarfiit salinneqarnissaannut eqqakkallu umiarsuarmik aallarunneqarnissamut piareersarneqarnissaannut siunnersuutinik saqqummiussipput. Suliniutit amerlanerit Nunarsuaq tamakkerlugu anguniakkanut tapeeqataajutigalutik Kalaallit Nunaata piujuartitsinermik tunngaveqarneranut iluaqutaasussat kissaatigineqarput.
Ulloq 21. september World Cleanup Day-p ingerlanneqarnerani (nunarsuarmi tamarmi ulloq saliiffik) CSR Greenlandip Plastic Not So Fantastic suleqatigalugu Nuummi sineriaap ilamininngua salinniarpaa. Uani annertunerusumik paasisaqarit (World Cleanup Day nyhed).
