Suliffiit peqqissut
Suliniut Suliffiit peqqissut ulluni 25.-26. september Sisimiuni naggaserneqassaaq, tamatumani immikkoortoq III-mi eqqarsartaatsikkut peqqissuuneq pingaarnertut qulequtaritinneqassalluni.
Ingerlatsiveqarfinni namminersortuni pisortanillu ingerlanneqartuni suliffeqarfiit 26-t suliniummi peqataapput aammalu suliffeqarfimminni peqqissuunissaq pillugu aallartitanik ilinniartitsillutik.
Statens Center for Folkesundhed, Grønland/SIF peqataasut akornanni apeqqutinut akissuteqarfissiaq atorlugu misisssuinermik apersuinermillu ingerlataqarput. Misissuinermi qulequtarineqarput Peqqinnartumik inooriaaseqarneq (timimik atuineq, pujortartarneq, imigassaq), Peqqissuseq atugarissaarnerlu (nammineq peqqissutsimik nappaatinillu naliliineq) aamma Eqqarsartaatsikkut peqqissuuneq (inuunermik naammagisimaarinninneq, kiserliorneq suliffeqarfiullu iluani qinngasaarineq). Paasissutissanit katersorneqartunit misissoqqissaakkat immikkoortoq III-mut atatillugu peqataasunut tunniunneqassapput.
SIF peqqissutsimut takussutissianik assigiinngitsunik pingasunik suliffeqarfinnit atugassanik suliaqarpoq:
Suliffeqarfinnut tamanut pingaarnertut nalunaarusiaq, tassani 2018-imi innuttaasut akornanni misissuinermit paasissutissanut sanilliussisoqarluni.
Suliffeqarfiit/immikkoortortat akissuteqarnerat, tamatumani suliffeqarfiit qulit sinnerlugit sulisullit aammalu 1/3-ii sinnerlugit misissuinermut akissuteqarlutik.
Suliffeqarfinnut mikinerpaanut ataatsimut isigalugu maluginiagassaqarfiusunut atorneqarsinnaalluartunik akissuteqarneq.
Kalaallit Nunaanni Timersoqatigiit Kattuffiat peqqissuunissaq pillugu aallartitatut ilinniartitaanermik 2020-mit neqerooruteqarniarpoq.
