Saligaatsoq 2021-imut peqataanissinnut qujanaq!
Illoqarfiit tamarmik nunaqarfiillu 23-it Saligaatsoq 2021 ingerlappaat
Ataani atuarsinnaavat saliisitsinerit pillugit paasissutissat kingulliit.
Narsami maajip tallimaani saliisitsineq ingerlanneqarpoq iliveqarfimmilu aamma saliisoqarluni. Ataqatigiissaarinermut peqataasut tassaapput Narsami Kulturimut, Sunngiffimmut Pinaveersaartitsinermullu Ingerlatsivimmi, Brugseni Narsaq, Ilagiit Sinniissaat Narsaq, Inuili, Henning Jensen, Timersortarfik aamma N-85. Saliisitsinermut aningaasaliisut tassaapput Neqi A/S, Brugseni Narsaq aamma Inuili. Narsami Qatserisartut nammineq kajumissutsiminnik aamma peqataapput.
Paamiuni Najukkami ataatsimiititaliap saliisitsineq ataqatigiissarpaat. 9. juni saliisitsineq innuttaasunit peqataaffigilluarneqarpoq, meeraaqqaniit utoqqarnut peqataapput. Puussiarsuit 800-it missaaniittut immerneqarput.
Ittoqqortoormiini Saligaatsoq sapaatip akunnera 34-mi ingerlanneqarnissaa pilersaarutaavoq.
Eqqumaffigiuk nunaqarfiit allat saliisitsinermik nammineerlutik ingerlatsisimasinnaammata uani allaaserineqanngitsumi, allattoqarfimmut nalunaarutigineqannginnera pissutaalluni. Sinerissap sinnerani saliisitsisimanerit uani atuarsinnaavatit. Kalaallit Nunaanni saliisitsinerit pillugit allattorsimaffik uani takusinnaavat.
Qujanaq
CSR Greenland sineriaq tamakkerlugu suleqatigiinnermut ingerlaavartumut qujassuteqarusuppoq, qujaffigineqartullu tassaapput nammineq kajumissutsiminnik peqataasut, suliffeqarfiit, aningaasaliisut, suliniaqatigiiffiit, kommunit, Namminersorlutik Oqartussat minnerunngitsumillu innuttaasut saliisitsinernut peqataasartunut.
Saliisitsisimanerit pillugit paasissutissanik assilisanillu nassiussinissamut suleqataarusussusermut allattoqarfik aamma qujarusuppoq, paasissutissanimmi katersineq Saligaatsoq ineriartorteqqinnissaanut tunngaviliisarmat aamma siunissami eqqakkat pillugit suliniuteqarnissamut ingerlariaqqinnissamut. Sammivimmi soqutigisaqaqatigiit oqaloqatiginissai CSR Greenlandip qilanaarutigaa. Saligaatsumut peqataasimasut assinillu nassitsimasut tamaasa qutsavigaagut – assit arlalippassuit Saligaatsup facebook-imi gruppeani takuneqarsinnaapput.
