Kalaallit Nunaanni piujuartitsinermik tunngaveqartumik takornariartitsineq

Illoqarfimmi pingaarnersaani mittarfik tallisinniarlugu silinnerulersinniarlugulu Nuummi innuttaasut qaarsunnik qaartitsisoqartoq tusaakulavaat.

Ukiut pingasut qaangiuppata Nuummi mittarfissuaq nutaaq piariissaaq. Tamannalu isumaqarpoq takornarissat amerlanerit, taakkulu naatsorsuutigaat takornariartitsineq piujuartitsinermik tunngaveqartoq.

Kisianni piujuartitsinermik tunngaveqartumik takornariartitsineq sunaava? Takornarissanuna suna naatsorsuutigigaat aammalu takornariartitsisup suliffeqarfittut suna ukkatarissavaa?

Takornarissanik amerlanerusunik sullitaqalersussat ilaat tassaavoq Hotel Hans Egede. Suliffeqarfik aqqaniliusuni suliffeqarfiuvoq CSR Greenlandip suliniutaani “IPUK – piujuaannartitsineq aallaavigalu ineriartorneq”-mi peqataasoq. Periusissiornermi piujuaannartitsineq aallaavigilerumallugu hotelli peqataavoq.

Suliffeqarfimmut piujuaannartitsinermik tunngaveqartumik takornariartitsineq isumaqarpoq niuerneq pitsaasoq, ullutsinnilu imarisai tassaasinnaapput avatangiisinut ilisarnaatit, unnuisartuni sulisunilu peqqinneq atugarissaarnerlu, eqqakkanik immikkoortiterineq Kalaallit Nunaannilu inuusuttunut praktikkerfissaqartitsineq.

Qulequttat takornarissat mittarfissamut nutaamut minnginnerminni suliffeqarfiup pikkoriffigineruligassai.